Kutob lang ko sa pagpangagpas sa gibati sa mga kandidato sa administrasyon matag higayon nga ituboy ang ilang mga kamot ni Presidente Arroyo sa matag tapos sa ilang kampanya sa lugar nga ilang gibisita. Hangtud lang ko sa pagduda nga wala gyud hingpit mahimuot ang kandidato pagkasenador nga nakatupad sa presidente atol sa pag-isa sa ilang mga kamot. Ingon ug gihan-akan sa tanang malas ug gibanigan og tunok ang mga kandidato nga nalakip sa grupo sa presidente tungod kay hangtud karon, nagpabiling nahipatik sa agtang ug panga'an sa presidente ang isyu sa pagpanikas ug ang gipistahan nga "hello garci".
Human sa 2004 nga eleksyon, posibleng nakalimtan na sa kadaghanan ang giingong pagpanikas sa kasamtangang administrasyon. Labi na kung kalambuan ug proyekto ang gibuhos sa mga lugar nga nagsaba-saba ug nagduda sa iyang pamunoan. Apan ang eleksyon karong Mayo, way duda, maoy mobanhaw sa labing dakong kontrobersiya nga gipokpok sa kasamtangang administrasyon. Ang piniliay karong Mayo maoy mobukas sa mga kahadlok ug kabalaka nga masubli na usab ang tikas sa 2004. Ang dagway ug panga'an sa presidente maoy mopahinumdum sa katawhan sa kwestyonableng resulta sa eleksyon. Si Presidente Arroyo ang tunok sa kampanya sa grupo sa administrasyon nga kanunay nga uban kanila o kanunay nilang giubanan sa nagkada-iyang dapit sa nasud.
Nigawas na ang gikahadlokan sa grupo sa administrasyon. Ang mangiwit ug mokaon og abog sa resulta sa labing uwahing survey sa "Social Weather Station" sa kauluhan. Ang nag-unang unom nga kandidato pagkasenador iya sa oposisyon pwera nalang ni Kiko Pangilinan nga padayong gibarugan nga wala siya'y grupong gidapigan. Kung ako ang anaa sa kampo sa administrasyon, siguro libuan ka pangutana ang nagduwa sa akong huna-huna kung nganong dapig sa oposisyon ang mayoriya sa katawhan, nganong nangiwit ang among grupo ug kung nganong wala mo epekto ang minilyon ka pesos nga gigahin alang sa "political ad" aron lang kuhaon ang suporta ug boto sa katawhan.
Apan sa mubo ug simpleng paghinuklog sa kasamtangang resulta sa survey, wala ba musod sa huna-huna sa mga kandidato sa administrasyon nga ang labi nilang dakong tunok mao ang usa ka presidente nga kanunay'ng ana-a nagpatunga sa ilang kampanya? Dili na kinahanglan nga mahibo'ng pa ang mga kandidato sa Unity Ticket nganong daw gipalid lang sa hangin ang ilang minilyon ka pesos nga gahin sa political ad tungod kay ang tinuod nga tubag, gilubong lang ang ilang kredibilidad ug dungog sa usa ka tawo nga hangtud karon wala pa malimpyo ang panga'an sa kahitas-an ug sa publiko sa giingong pagpanikas sa miaging eleksyon.
Mas mosamot pa ang kalagot ug kalibog sa mga tawo kung magpakita sa mga kampanya ang wala nay makalabaw sa matud pa, kabalingbing nga si Tessie Aquino Oreta, ang giilang "dancing queen" sa senado ug si Tito Sotto. Unsaon pagpatuo sa mga kandidato sa administrasyon sa publiko sa ilang mga plataporma, kung sa entablado nga ilang gibarugan, anaa ang mga personalidad nga nagpakita unsay posibleng mahimo sa tawo nga way baruganan? Unsaon pagbilib sa katawhan sa taga administrasyon nga nagbitbit og mga personalidad nga hangtud karon, kwestyonable ang sinsiridad ug nabasa na ang loyalidad?
Human ko mahimuot sa "hello gaci" sa pasundayag nga Going Bulilit, kalit ko nga nahilom ug naghuna-huna nga basin mahitabo na usab ang giingong senaryo sa piniliay sa Mayo. Basin nagkadaiyang diskarte sa pagpanikas ang himuon ug dili lang ang pagtawag sa mga sama ni Garci, aron lang makab-ot ang kadaogan sa eleksyon. Apan kinsa ang tinuod nga tunok sa eleksyon ug kalambuan sa nasud? Ang mga tawo nga wala magpakabana mga panghitabo sa palibot.