Politically expensive

Nikaylap og maayo ang kabalaka nga sunod nga bawion ug patak-upan ni Gobernador Gwendolyn Garcia mao ang Fuente Osmeña oval diin gipanag-iya sab diay sa Kapitolyo human sa pagtak-op sa access road diha sa karaang larsian.

Ang Fuente oval usa lang sa daghan pang mga luna nga iya sa probinsiya ang gitinguhang bawion sa Kapitolyo tungod sa napornada nga sabot-sabot tali sa dakbayan ug lalawigan sa pagbinayloay og luna.

Kun tinuod ang mga report nga lakip sa gitinguha sa Kapitolyo ang pagpatak-op sa Fuente Oval angayan sigurong tun-an usa og maayo sa gobernador ang maong plano. Bisan tinuod kon dia ni sa dakbayan, apan dili lang mga molupyo sa syudad maoy maapektuhan niini.

Pananglitan, ang Fuente Oval naa mahimutang duol sa Vicente Sotto Memorial Medical Center, diin hapit tanang mga masakiton gikan sa probinsiya naa diha dad-a. Sa higayon nga matak-upan ang Fuente Oval sigurado ko nga suliran sa grabing trapiko makaapekto kaayo sa mga pasyente nga dad-on diha sa Vicente Sotto.

Gawas niini, ang mga probinsiyano nga gustong moanha sa Kapitolyo sagad niini moagi gyud sa maong dapit. Busa dako ang akong pagtoo nga di mahitabong patak-upan na sa gobernador.

Di sab siguro makaako si Gobernador Garcia nga isakripisyo ang mga kinabuhi sa mga masakitong pasyente gikan sa kalungsoran nga magkinahanglan og hapsay nga agianan paingon sa tambalanan. Kon, buhaton man gani ni sa gobernador, usa ni ka dako nga "political risk" alang kaniya.

Sigurado kong nakasabot ang gobernador nga "politically expensive" alang kaniya kon iya ning himuon.

* * *

Ang labing maayong buhaton karon sa Kapitolyo ug sa dakbayan mao ang pagbalik sa negotiating table. Angayang isalikway sa duha ka kampo ang bisan unsang mga pagduha-duha ug ipakita ang sinsiridad sa matag-usa aron malikayan nga mapurwisyo ang mga inosente.

Si bokal Victor Maambong miingon nga angayang di mabalaka ang dakbayan sa ilang baruganan nga value-for-value ang paagi sa land swapping tungod kay andam silang molugak niini atol unya sa sabot sabot.

Ang importante matud pa ni Maambong nga mabalik sila sa negotiating table. Si Maambong miingon nga posibling mahangyo sa dakbayan nga i-relax sa lalawigan ang ilang posisyon. Apan kining tanan mahitabo lang kung dunay negosasyon.

* * *

[email protected]