Ang maong lakang sa administration candidates nga anhi sa Sugbo magpaproklamar nagpakita sa dako nilang pagtan-aw sa Sugbo. Busa angayan natong barugan ang paggitib natong mga Sugboanon labaw kaysa imperialistang taga Manila.
Atong mapakita ang atong panaghiusa pinaagi sa pagpili og maayong mga kandidato sa umaabot eleksiyon. Segurado ko nga kon kita magkahiusa kalikayan nato ang pagkatumpawak sa kaalautan pinaagi sa mga kamot niadtong mga kandidato nga hakog ug way nahimo sud sa taas nang mga panahon nga sila diha sa pwesto.
Ang labing importante mao nga kapugngan nato ang pagsud sa senado niadtong mga tawo nga nagtinguha sa atong kaalautan isip usa ug numero unong lalawigan sa tibuok nasud.
Samtang si Miguel Zubiri wa sab makontinto sa pagpanglamano, iyang gigakos ug gihagkan ang usa ka tiguwang nga didto sa Coliseum niadtong Sabado. Ang labing gihugyawan sa tanan mao ang aktor nga si Cesar Montano.
Bisan kon nagtuwad tuali ang iyang binisaya, kay lagi nagpatuo man siyang usa ka bisaya, ug bisan way plata porma nga gikapresentar sa publiko, si Montano maoy labing gihugyawan sa mga tawo. Gani matag higayon nga ipakita ang iyang dagway sa big screen didto sa Coliseum di ka pugong ang mga tawo sa paghugyaw.
Kon basihan ang hitabo niadtong Sabado, nahadlok kong ang popularidad lang gihapon maoy dakong barometro nga gitamdan sa mga botante pagpili ug kandidato ug dili ang ilang mga plano ug programa sa panggobyerno.
Si Tessie Oreta hinuon klarong nalipaghong sa kauwaw tungod kay klarong iyang nabatyagan ang bugnaw nga pagdawat sa publiko kaniya human sa iyang gihimo atol sa impeachment trial ni kanhi presidente Joseph Estrada kaniadto.
Kon wa pa si Presidente Arroyo atol sa maong kalihukan, posibli gani sigurong nakatilaw gyud og boo si Oreta gikan sa publiko. Wa gyuy uwaw nga nibarog sa entablado uban sa presidente nga iyang gisaway og maayo kaniadto.
Si Oreta nanawagan sa publiko nga kalimtan na kuno ang iyang pagsayaw sayaw kaniadto didto sa hawanan sa Senado atol sa impeachment trial ug maghiusa na alang sa kalamboan. Way dautan sa iyang panawagan, apan nakalimot siya nga mamahimo gihapong magmalinawon ug magmalamboon ang nasud bisan kon wa siya sa senado.
Gani mas dako pa og kahigayonan nga magpadayon ang kaguliyang ug kagubot sa nasud kon ang naa sa senado sama niyang way baruganan ug balimbing ang manglingkod.