EDITORYAL — Ayaw pataka'g botar

Kasagaran sa mga pumipili sa eleksyon wala magtan-aw sa matang sa kandidato nga ilang botahan. May katakos ba o wala.

Kasagaran ilang ihatag ang ilang bililhon nga boto ngadto sa mga kandidato nga walay kabangkaagan tungod lang kay kini mga sikat nga artista sa pelikula o telebisyon o ba kaha mga atleta.

Kining sayop nga pagpili og kandidato gihisgutan sa usa ka mahistrado sa korte atol sa gipahigayong Democracy and Law at the Service of the Human Person seminar dili pa lang dugay.

Tinuod ang maong obserbasyon. Daghan sa atong mga botante ang magpataka lag botar diin wala nila hunahunaa ang implikasyon sa ilang pagpataka ngadto sa kaayohan sa nasud.

Panahon na nga usbon unta sa atong mga pumipili ang ilang kinaiya kalabot sa pagpili og kandidato.

Hunahunaon unta nila ang kadaut nga mahimo ngadto sa nasud kon sila magpasagad lag botar tungod lang kay ang ilang gibotahan ilang personal nga idolo bisan kini walay katakos sa pagpangu sa nasud.