Katapusa'ng establisamento'ng gitulis mao ang Anchor Bank nga nahimutang sa Archbishop Reyes Avenue. Kaniadto lamang Martes sa hapon, duha ka armado'ng tawo ang mitulis sa maong bangko ug ilang nadala ang kapin sa P300,000 nga salapi.
Ang maong bangko duol lamang usab sa laing bangko nga kaduha na usab gitulis sa giingo'ng Rey Torres Group.
Sukad niadtong Enero, lima na ka dagkong tulis ang narekord sa otoridad sa dakbayan. Ang mga tulisan, matud sa kapolisan, mao ra gihapon kadtong mga sakop sa Rey Torres Group nga ilang gitumbok nga responsable sa mga pagpanulis sa Metro Cebu sa nakalabay'ng katuigan.
Kon mao kini, wala pa diay mabungkag ang maong grupo bisan pa man sa pagkasikop ni Torres ug pagkamatay sa pipila ka sakop niini atol sa mga police encounter. Kon dili mabungkag ang maong grupo, kuyaw nga dili gayud molurang ang mga pagpanulis dinhi.
Nakapaalarma na kining sunodsunod nga pagpanulis sa dakbayan sa Sugbo. Mora'g dili na hinuon magsilbi ang kapolisan batok niining mga tulisan, kinsa yano lamang mopahigayon sa ilang dautang binuhatan.
Hinuon, wala mahadlok si Cebu City Police Office director Patrocinio Comendador nga marelibo sa iyang katungdanan gumikan niining sunodsunod nga pagpanulis sa dakbayan. Matud niya nga bag-o lamang siya sa puwesto ug daghan pa siya'g bulohaton pagpalambo sa kuwerpo sa kapolisan.
Si Comendador nagkanayon nga bisan pa sa panahon sa mga nanglabay'ng hepe sa kapolisan, sige gihapon ang mga pagpanulis sa dakbayan.
Hinuon naghatag na og kamandoan si regional police office director Silverio Alarcio sa kapolisan sa dakbayan pagsumpo sa mga pagpanulis ug nga dili na siya gusto'ng may mahitabo pang tulis sa siyudad ilalum sa pagdumala ni Comendador.
Hinuon dili na ikatingala ang insidente sa mga pagpanulis sa usa ka moderno ug progresibong lugar sama sa Sugbo. Apan kon ang mga pagpanulis sunodsunod nga mahitabo ug mugna sa usa ka grupo nga daan nang gimonitor sa otoridad, nagpasabot ba kini nga nagkulang usab ang kapolisan pagmintenar sa kalinaw ug kahusay sa dakbayan?
In fairness usab sa atong kapolisan, ila nang gipatuman ang tanan paghan-ay sa kahusay ug kalinaw sa dakbayan. Apan sa akong nakita, mora'g kulang gihapon sila pagpatuman og mga programa pagpakgang niining pagpanulis sa mga establisamento.
Apan dili nila ikalimod nga makalusot gihapon ang mga tulisan gumikan usab sa mga buslot sa ilang pagpatuman sa kahusay ug kalinaw. Ug ang kakulang usab sa police visibility maoy usa sa mga hinungdan ngano nga nagkadaghan ang insidente sa pagpanulis sa dakbayan.
Angay sigurong suhiron sa otoridad ang mga lugar sa dakbayan diin kasagaran maoy mahitaboan sa mga pagpanulis sama sa Archbishop Reyes Avenue, diin duha ka pagpanulis ang nahitabo sulod lamang sa pipila ka adlaw.
Ang nahitabong pagpanulis sa maong lugar usa ka dakong dagok dili lamang sa kapolisan kondili sa lokal nga kagamhanan tungod kay usa kini sa mga sentro sa komersiyo sa dakbayan. Tungod niini, dili ba kaha bation og kahadlok ang mga magpapatigayon kinsa posible unya nga mokalagiw ngadto sa laing lugar tungod sa nagsakang krimen sa dakbayan sa Sugbo?