13th month sa pakyaw?

Tukion nato karon ang mahitungod sa trabaho nga pakyaw ang kasabotan o kondisyon. Nakadawat man god kog text nga naghisgot mahitungod niini. Mihangyo lang ang nag-text nga dili ibutyag ang kompleto niyang cellphone number sa tuyo nga dili siya mabisto ngadto sa iyang agalon.

Ang iyang text nag-ingon: "Good day, Sir. Bahin sa 13th month pay ang akong ipangutana. Gusto kong masayod kon husto ba ang 13th month pay nga gihatag nako sa akong amo sulod sa 6 years nga pagtrabaho. P4,500 ray iyang 13th month pay sa sama nako nga pakyaw-pakyaw ang trabaho? Ug kon mo-resign ko, may makuha ba kong separation pay? Daghang salamat." -- 0921-5885xxx

* * *

Maayo unta kadto kon imong gibutyag kon unsang matanga kanang trabaho nga imong gisudlan. Pakyaw-pakyaw man god kaha kana? Pero dugay na gyod kanang maong pakyaw kay miabot na man og unom ka tuig ang imong pagtrabaho.

Anyway, sumala sa akong nasayran bahin sa trabaho nga pakyaw-pakyaw, dili obligado ang employer kun agalon sa paghatag og 13th month pay. Kana kon wala ko masayop. Sa imong bahin, kon nihatag pa ang imong agalon og 13th month pay bisan dili siya obligado kay pakyaw-pakyaw man lagi ang trabaho, angay kang magpasalamat kay dili diay bentahoso ang maong amo. Buotan siya ug maantigong maghunahuna sa mga kabos. Maayo siyag kabubut-on.

* * *

Ako pod nga klarohon nga ang 13th month pay wala ibase ang paghatag niini sa kon pila ka tuig ka nang nagserbisyo. Gibase ang kuwentada niini sa kon pila ang imong katibuk-ang suweldo sulod sa usa ka tuig. Ang katibuk-ang kantidad bahinon ngadto sa dose ka bahin ug ang usa ka bahin niini mao ang kantidad sa 13th month pay. Ingon niana ang paagi sa pagkuwenta sa 13th month pay.

Bahin sa imong pangutana kon may makuha ka bang separation pay kon mo-resign ka, sa akong nasayran morag walay obligasyon ang imong amo nga hatagan kag separation pay ilabi na nga pakyaw-pakyaw ang imong trabaho. Mao man god kaha kini ang tinuod nga estado sa imong trabaho? Gawas pa, ikaw man ang gustong mobiya sa work.

(Sumbong ug reklamo? Text sa 0910-8105522).