Armas kuno

Niadtong Enero 17, 2007 may nanawag sa akong cellphone. Bisan wala marehistro sa akong phonebook ang numero sa nanawag apan ako kining gitubag. Nadawat nako ang iyang tawag sa 09:42:49 base sa narehistro sa call register sa akong cellphone pero, nasayod kong dili akoy tuyo sa nanawag base sa transaksiyon nga iyang gipadayag nako. Wrong number ba kaha? O lain ang hinungdan.

Ang nanawag kanako nagpaila sa ngalan nga Ronie D., gikan sa Danao. Nagpahibalo siya nako nga naa na (kuno) ang armas nga .45 kalibre nga gusto nakong paliton. Nahikatawa ko sa hilom kay wala man ko mag-order og armas. Unsaon ko man ang armas nga dili man kini magamit sa akong trabaho. Pero gitubayan ko siya aron makakuha kog dugang impormasyon gikan kaniya.

Base sa iyang gisulti, akong nasuta nga nagtuo siya nga ako ang polis nga mi-order kaniya og armas. Ang number ni Ronie D. mao kini: 0920-3830492. Maayong masuta kon dili ba illegal nga armas ang gipamaligya niining tawhana. Angay sab sutaon kon nganong lakip ang polis adto man mopalit niyag armas.

Dihang ako siyang gipangutana kon diin niya makuha ang akong number, miingon siya nga ang ako kunong cellphone number maoy gihatag sa iyang kontak. Niini nahibulong ko. Nganong na-involve man ang akong cellphone number sa transaksiyon tali ni Ronie D. ug sa polis nga giingong miorder kaniya og armas?

Akong klarohon nga wala gyud ko mag-order og armas. Wala ko magkinahanglan og armas kay dili man ko polis o bisan unsang may awtoridad pagpatuman sa balaod. Usa ko ka magsusulat busa makinilya ang akong gikinahanglan, dili armas. Mao nga ang pagkalambigit sa akong cellphone number sa transaksiyon nila ni Ronie D. ug sa polis nga mopalit niyag armas nakahatag nakog tanghaga.

Basin dunay gustong moamong-among nako bisan sa akong pagka ultimo. Basin iframe-up ko o dunay nagplano sa pag-frame up nako kay nganong ang ako mang numero ang natawagan sa dealer og armas. Makapaduda kini alang nako. Pero ang angay gyud himoan og pakisusi mao ang pagpamaligya og armas ni Ronie D. diha sa Danao.

* * *

(Sumbong ug reklamo? Text sa 0910-8105522)