EDITORYAL - Kalooy baya sa atong nasud

Nakamatikod na man tingali mo nga tungod kay ang ubang elective officials -- senators, congressmen, governors, vice governors, mayors, etc. -- dili na man makapasubli pa sa umaabot piniliay, ilang asawa/bana, anak, ug uban pang kabanay maoy ilang padaganon sa puwesto nga ilang biyaan.

Sa ato pa, mga sakop ra sa ilang pamilya ang buot nilang mohulip kanila sa katungdanan nga ilang biyaan.

Dili man unta ni maoy husto. Dili man sab unta ni makataronganon. Hatagan sab unta ang ubang tawo og kahigayonan nga makasilbe sa nasud.

Sayop. Apan nahimo na kining tradisyon sa pamolitika dinhi sa atong nasud busa ang maong sayop nahimo nalang nga husto kay wa may nangreklamo batok niining maong praktis.

Daghan unta ang gustong mosuway usab sa pag-alagad sa nasud apan mo-atras na lang tungod kay ilahon na man lang ang tanang puwesto sa mga anaa nang daan sa poder.

Kalooy baya sa atong nasud.