Kon akoy pabut-on, winner silang tanan!

Tinuod, samtang nagkadiyutay ang mga participants, nagkanindot sad hinoon. Alang nako, kon akoy pabut-on, padag-un nako sila tanang mga contingents sa miaging Sinulog.

Kon akoy chairman sa Sinulog Foundation, pangitaan nakog paagi nga ang tanang mga participants, pahinungdan gyud. Ug tungod kay di man gyud ma-first prize ang tanan, dili makaangkon og luna sa pagdaug, at least pahinungdan ang tanan, ilabina ang mga out-of-towners.

Dili lalim ang pag-organize og mga contingents of 100 people, unya imong dad-on nganhi sa Sugbo gikan sa Mindanao. Ang pag-practice lang daan, gasto na, unya ang mga props ug costume. Di gyud lalim.

Hinuon, kon alang sa Sto. Niño ang tanan, ma-wa ang tanang kahago, ma-way bili ang mga gasto, ug ang enthusiasm, kahinam ug kaikag maoy mo-prevail.

Apan, bisan pa, maayo gyung kapahinungdan sila. At least, pagpagaan og gamay sa ilang effort pagsalmot sa Sinulog.

Dugay-dugay na man kong mag-TV na lang panahon sa Sinulog, ug maoy akong nakita karon nga nindot gyud kaayo.ang performance. Ang costume, ang mga props, daku na nga gasto. Unya, ang ilang plite sa barko ug ang ilang pag-stay dinhi sa ato.

Mao nga akong usbon, maayo gyung pahinungdan ang tanang participants. Ug sa sugyot ni Boy Odilao, ang father sa Sinulog, paapilon nato ang mga Barangay. Atong hangyoon ang Commission on Audit nga mangita silag paagi unsaon nga makasalmot ang mga barangay.

Unya, nagmahay sad mig gamay. Nakalimot sila nga sa pagka-malampuson karon sa Sinulog, duna gyuy nagsugod niining tanan. Of course, sa iyang pagka-director sa Ministry of Youth & Sports Development, naumol sa hunahuna ni Boy Odilao ang Sinulog, pahinungod sa Santo Niño de Cebu, Ug sa panahon ni Mayor Florentino Solon, kauban sa Arena 7, namugna ang unang Sinulog sa Sugbo sa tuig 1981 ba to.

Sa ato pa, kami sa ARENA 7 ang nagsugod niining tanan. Ug karon, nangayo unta mig tiket o passes sa Cebu Sports Center aron unta di kaayo mi mahasol pagtan-aw sa performance sulod sa Abellana grounds. Apan, ambut nahatagan ba mi, wa na ko kahibawo.

But, anyway, lipay kaayo mi nga kanunay'ng nagmalampuson ang tinuig nga Sinulog. Matag tuig duna gyuy mga improvement. Congratulations, Vice Mayor Mike Rama.