Unsa, ila gyung ipadayon ang Cha-cha?

Pastilan, di gyud sila mo-give up. Tapus isalikway sa Supreme Court, sa makadauhang higayon ang People's Initiative, ug tapus yam-iri sa katawhan ang ilang ipamugos unta nga Constitutional Assembly, adunay huhungihong nga sila na sang pasiugdahan ang laing mga effort to push through sa Cha-cha.

Sa ato pa, samtang nangandam na konohay ta sa eleksiyon, nagpadayon usab ang ilang mga tinguha pagpahigayon sa Cha-cha, aron di mahinayon ang eleksiyon, ug matuman na ang ilang mga gusto.

Unsa may ilang gusto?

Kon nahinayon pa to ang Con-Ass, sila na lang ang mga tawo ni Gloria ang magbuot sa tanan. Wa nay Senado, way 2007 election, ug lagmit molapas pa sa 2010 ang ilang paghupot sa gahom. Nindota no? Hayahaya no?

Nindota nila no? Hayahaya nila no?

Apan, kita, Dro, unsa man? Nindot ta? Hayahay ta?

Ug nganong ila man gyung ipamugos ang Cha-cha? Nganong ila mang dali-dalion? Ug nganong ila man gyung wagtangon ang Senado aron wa nay maka-check and balance nila?

Mao ra ba ni ang tuyo sa Constitution. Sa Amerika, wa gyud sila magdamgo nga wagtangon ang ilang Senado, kay maoy ilang gusto nga mag-iyahay og check ang tulo ka branches sa gobiyerno.

Apan, nganong mao may gusto ni De Venecia nga siya na lang usa ang manghawod sa Kongreso o sa Parliament? Ngiga niya no?

Manghinaut lang ta nga mo-submit na lang sila sa eleksiyon. Sa very clean ug very honest election. Mahimo kaha ni nila, Dro? Mao ni ang angayan nilang buhaton. Ug mao ni ang tiunay ug dungganang legacy nila ni De Venecia, Abalos, Nograles, Pichay, Villafuerte, Andaya, Del Mar, ug mga alalay, nga ilang ikabilin sa katawhan.

Make the coming election very clean and honest, aron gyud maoy motumaw ang tinuod nga kabubut-on sa lungsod. Lisud ba gyud ning buhaton, Dro?