Maayo ra!

Maayong kutloan og pagtulon-an sa mga magtutudlo sa mga tunghaan ang kaso sa duha ka maestra nga girekomendar sa Ombudsman nga pasakaan og kaso tungod sa pagdagmal sa duha nila ka tinun-an.

Sayonan ka, ang usa ka bata nga nagtungha sa grade II pa lang, gidistino niadtong higayona sa pagpanilhig. Unya, samtang nanilhig pa intawon ang bata, nagpahigayon na og examination ang maestra.

Resulta, paghuman sa pagpanilhig sa bata, nagkadali-dali tawon siya pag-apas nga mahuman niya pagsuwat sa tubag diha sa testpaper.

Sa laktud, hapit tanan sa mga pangutana wala gayod matubag sa bata. Giluknit sa maestra ang dunggan ug mao nga mitiyabaw pag-ayo ang bata.

Sa kasuko pa g'yod sa maestra, iyang gisugo ang mga lalaki niyang tinun-an og gipugos nga gidala sa atubangan sa mga tinun-an kadtong bata nga gamay ra og kuha.

Sa tantong liksi-liksi sa bata kay mauwaw nga madala ngadto sa atubangan sa iyang mga classmates, nakita tawon ang iyang underwear.

Gikasab-an pag-ayo sa maestra ug gipakauwawan ang bata. Iya kining giingnan nga magpahiling sa doktor aron masulbad ang pagkahinay niini sa pangisip.

Duna say laing maestra nga mipakauwaw sa iyang lalaking tinun-an pinaagi sa paggisi sa notebook niini unya gibunlot kini gikan sa iyang lingkoranan.

Mao gihapon ang rason, ang bata dili kaayo maantigo sa leksyon og maoy hinungdan nga kini masuko.

Paita, husto ba god ang ilang gibuhat? Kining maong mga magtutudlo angay g'yod nga taralon sa hukmanan aron nga masilotan sila sa paglapas sa anti-child abuse law.

* * *

Tukma kaayo ang nahuna-hunaan ni Koronel Patrocinio Comendador nga kutahan niya ang mga sakop sa Cebu City PNP traffic group kon pila'y dakpon nga dispatcher ug watch your car boys matag semana.

Hinoon, ang mga watch your car boys dili man direkta nga mangayo sa mga tag-iya sa sakyanan, apan hilas kaayo nga inay giyahan nila ang mga driver sa pag-atras anha na sila mag-atang sa dapit sa drayber inigdayong larga.

Dili kini maoy angay'ng buhaton sa mga watch your car boys. Nganong anha man kamo mag-atang sa atubangan? Mas gikinahanglan kamo sa luyo aron makatan-aw nga dili madam-ag ang sakyanan sa likod.

Alang kanako, mas maayong ilakip sa pagdakop kining maong mga watch your car boys. Tiaw mo, bisan diha sa simbahan sa Cathedral gisudlan na usab og watch your car boys.

Wala masayop ang uban sa pag-isip nga mga yano lang extortionist kining mga dispatchers nga dili na ra ba modawat og P1.

Ang ilang dawaton P5 na g'yod unya kon daghan ang mosakay, P10.

Kay ngano, wala ba go'y mosakay sa mga PUJ kon wala kining maong mga dispatchers?

Sigurado ba g'yod nga dili malungkab ang imong kotse kon bantayan niining maong mga watch your car boys? Dili kaha sila mahadlok kon moatake na ang mga kawatan?

* * *

Awhag usab nako ni Koronel Comendador ug sa kadagkoan sa Traffic Group, ipaapil og dakop sa mga sakop sa anti-jaywalking task force kining mamaligya og sigarilyo og newspaper nga maglakaw-lakaw tunga sa karsada.

Samok kaayo kining maong mga tawo nga mora'g nagtoo na usab nga sila ang hawod sa karsada. Ang karsada alang sa mga sakyanan, kang kansang mga tag-iya nagbayad og dagko nga road users tax matag tuig.

Akong lauman nga mahimoan kini og aksyon ni higalang Pat Comendador karon nga siya na ang Haring Gangis sa kapolisan dinhi sa dakbayan.