Bahin sa SSS contrib ug loan

Niining bahina sa akong lindog, akong hatagan og luna kining text gikan sa usa ka magbabasa kinsa mihangyo nga dili lang ipatik og apil ang iyang cellphone number sa kahadlok ug kabalaka nga mabuking siya ngadto sa iyang kompaniya sa iyang pagpadangat sa iyang sumbong dinhi sa pinobre natong lindog.

Ang iyang text nagkanayon: "Good day, Sir. Mangayo unta ko og advice aron mahimoan og aksiyon ang bahin sa SSS contribution ug SSS loan nga wala i-remit sa among kompaniya. Unsay angay namong buhaton aron maaksiyonan sa SSS ang gihimo sa among kompaniya? Thank you very much." -- 0918-819xxxx

Wala man nimo itug-an kon gikuhaan (deduct) ba ang imong suweldo alang sa SSS contribution ug loan, pero ako na lang gisabot nga gikaltasan gayod ang imong suweldo tungod kay mireklamo ka man. Gigamit ko na lang ang akong sentido komon kay dili ka man tingali mopadangat og reklamo kon wala pa kuhai sa kompaniya ang imong suweldo alang sa SSS contribution ug bayad sa SSS loan.

Sa akong kaugalingong opinyon, ang labing maayo mong buhaton mao nga mosulat ka ngadto sa SSS ug isaysay sa maong sulat nga gikuhaan ang imong suweldo sa gitrabahoan nimong kompaniya pero wala kini i-remit isip imong contribution ug bayad sa imong loan. Nakompirmar na man kaha nimo nga wala gayod kini i-remit?

Paghimo og duha ka kopya sa imong sulat ug papirmahi ang usa niini sa taga SSS aron may mahuptan kang kalig-onan nga mireklamo ka ug nadawat sa taga SSS ang imong reklamo. Kon tinuod nga gikaltasan ang imong suweldo (nga akong gituohan nga mao gyo'y nahitabo), may katungod ka gyud sa pagtuki niini.

Dili ka angay mahadlok nga mabuking ngadto sa imong kompaniya kon kursonada ka gyud nga panalipdan ang imong katungod isip usa ka mamumuo. Katungod mo ang pagtuki niini. Ang SSS nay maantigong makig-atubang sa inyong kompaniya aron tukion ang imong reklamo. Sa ingon, imong masayran ang hinungdan nga wala ika-remit ang imong SSS contribution ug SSS loan. Basin diay kon aduna silay gisunod nga mode of payment nga maoy hinungdan niini.

* * *

(Sumbong ug reklamo? Text sa 0910-8105522)