Si Ponso pilato

Ang komitiba ni Senador Jinggoy Estrada miaprobar sa balaudnon nga maghatag og 125 pesos nga umento sa suhulan sa mga mamumuo. Kini sukwahi sa unang baruganan sa senador nga supak sa maong gidak-on sa umento sa suhulan sa mga anak sa singot.

Matud pa sa Senador nga walay usa sa membro sa iyang komitiba ang misupak sa nahisgutang umento. Apan dili pa hingpit nga maglipay ang mga anak sa singot niining pagka aprobar sa 125 pesos nga umento sa suhulan kana tungod kay ang report sa komitiba ni Senador Jinggoy Estrada aprobahan pa usab kini sa kinatibok-ang membro sa Senado.

Kon ugaling aprobahan sa kinatibok-ang membro sa Senado ang maong balaudnon ug ipasa na unya kini ngadto sa Malakanyang, dinhi na unya nato makita kon si kinsa ang duol sa kasing-kasing sa Presidente, ang mga kapitalista ba o ang mga anak sa singot.

Maro nga politiko si Senador Jinggoy Estrada. Daw sama siya ni Ponso Pilato nga nanghunaw. Tungod sa nagsingabot nga bugnong lugaynon, dili siya gusto nga kasilagan sa mga anak sa singot. Sayod siya nga dako kaayog ikatabang ngadto sa kandidatura sa mga Estrada ug sa mga sakop sa opposition ang iyang position.

Busa ang pagdesider iya na kining gipasa ngadto sa Malakanyang. Sa gihimo ni Senador Jinggoy Estrada, mabuking na unya dinhi ang presidente sa iyang pagpakaaron-ingnon. Dinhi ato unyang makita kon si kinsa ang anaa sa dughan sa Presidente, ang mga kapitalista ba o ang mga anak sa singot. Dinhi, dili sayon ang pagahimoon nga desisyon sa Presidente gumikan kay naipit siya sa duha ka puwersa nga pulos makahatag og tabang ug kadaot sa iyang mga kandidato ning nagsingabot nga bugnong lugaynon. Kon mopabor siya sa mga kapitalista, masuko ngadto kaniya ang mga anak sa singot, kon mopabor usab siya ngadto sa mga anak sa singot, masuko ngadto kaniya ang mga kapitalista, busa murag bibingka sa Mandaue si Presidente.

Kon si kinsa man ang iyang paburan, ato na lamang kining atangan.