Kalendaryo sa election period

Nagsugod ang election period niining miaging ika-14 sa Enero karong tuiga, ug matapos inig ka-13 sa Hunyo karon usab nga tuiga. Tungod kay nagsugod na ang election period, aduna nay mga kalihokan nga gidili ug gikinahanglan nga tumanon sulod sa maong panahon.

Sukad kaniadtong petsa 14 sa Enero, ginadili na ang pagdaladala og armas bisan pa kun kini lisensyado kon walay pagtugot gikan sa COMELEC. Ang paglapas sa maong lagda usa ka krimen diin ang nakalapas niini mamahimong pasakaan og kaso kriminal. Kon mapamatud-an nga sad-an, pagasilotan kini sa pagkapriso gikan sa usa ka tuig hangtod unom ka tuig. Ang nakabug-at sa maong silot mao nga ginadili ang probation sa maong kaso, busa matanggong gayud ang makonbikto niini.

Pagka petsa 15 sa Enero, nagsugod usab and pagsumiter sa Certificate of Candidacy sa mga senador ug mga lokal nga posisyon. Kadtong mga grupo nga gustong moapil sa party-list mamahimo na usab nga mosumiter sa ilang Manifestation Of Intent.

Karon petsa-28 sa Enero mao ang katapusang adlaw sa pagpasaka og petisyon aron pagpa-apil sa listahan sa mga kwalipikadong botante. Ang Petition For Inclusion adto ipasaka sa Municipal Trial Court diin nagpuyo o nag-apply sa rehistro ang botante. Pagka Pebrero 2, katapusang adlaw usab kini alang sa Petition For Exclusion.

Sa Pebrero 13 magsugod ang kampanya alang sa mga Senador ug party-list. Gikan niining maong petsa, ginadili ang pagpanghatag ug donasyon o regalo sa maong mga personahe. Sa Marso 30 usab mao ang katapusang adlaw sa mga party-list pagsumiter sa mga ngalan sa ilang mga nominees nga dili mosobra sa lima ka ngalan.

Ang kampanya alang sa mga lokal nga opisyales sama sa Congressman, gobernador ug mga opisyales sa probinsya ug sa mga kalungsuran magsugod karong Marso 30, 2007 hangtod sa Mayo 12. Sulod sa maong mga adlaw ug hangtod sa Mayo 14, ginadili ang pagtudlo og mga bag-ong empleyado sa goberno, o pagpasulod ug mga empleyado sa mga nabakante nga posisyon, gawas lamang kon adunay pagtugot sa COMELEC ubos sa mga lagda nga ilang gipatuman. Ginadili usab ang pag-uswag sa suholan ug mga benepisyo. Sa samang higayon, ginadili usab ang mga konstruksyon nga pagabayran gikan sa pundo sa goberno, ug pagpagawas ug kwarta gikan sa panudlanan sa goberno.

Tungod kay ang Abril 5 ug Abril 6 natunong man sa Huwebes Santo ug Biyernes Santo, ginadili sa maong mga adlaw ang pag-pangampanya. Sa bisperas usab sa eleksyon, o sa petsa 13 sa Mayo, ginadili gihapon ang pag-pangampanya. Pagka-Abril 9, 2007, ang komposisyon sa Board of Canvassers mahibaw-an na kon kinsa ang maglangkob.

Gikan sa Abril 14 hangtod sa Mayo 14, ang mga botante nga anaa sa laing nasud mamahimo na nga mobotar didto sa mga nasud diin sila magpuyo o nagtrabaho. Dinhi sa atoa, ang mga botante mamahimo lamang mobotar pagka-petsa 14 sa Mayo, gikan sa alas 7:00 sa buntag hangtod sa alas 3:00 sa hapon. Mamahimo lamang molapas sa alas 3:00 sa hapon ang pagbotar kon aduna pay botante sa presinto nga wala pa makabotar bisan diha na sila sa maong lugar.

Gikan sa Mayo 15, 2007 hangtod sa Hunyo 13, 2007, gikinahanglan nga ang mga kandidato, daugan man o pildero, mosumiter gayud sa ilang Statements of Contributions and Expenditures ngadto sa COMELEC, kay kon ila kining mataligam-an, adunay posibilidad nga kasohan sila'g kriminal sa paglapas sa maong lagda, ug kon mapamatud-an nga sad-an, masilotan pa og pagka-priso hangtod sa unom ka tuig. Dili na kinahanglan nga hulaton pa ang notisya sa COMELEC aron isumiter ang maong Statement. Alang sa mga naghunahuna sa pag-kandidato, angay ninyong timan-an kining maong mga lagda aron dili ta masikwate kay istrikto kaayo ang pagpatuman sa maong mga lagda, ug ang paglapas niini mamahimo pang usa ka election offense o basihanan sa disqualification.

Alang sa inyong mga panahom o reaksyon, palihug e-mail sa [email protected]. Daghang salamat.