Dili mohatag og pay slip

Usa ka magbabasa nga mihangyo nga itago ang iyang contact number aron dili siya mabisto sa kompaniya nga iyang gireklamo nagkanayon: "Good day, Sir. Mangayo lang unta ko sa imong opinyon bahin sa company nga fake. Ang gigamit nilang O.R. mao ang calendar nga ginunting ug dili pod sila mo-issue og pay slip. Gitangtang ko nila sa trabaho sa walay igong hinungdan. Gipangayoan ko sila og pay slip pero dili sila mohatag. Wala kunoy company nga mohatag og pay slip." -- 0921-57xxxxx

* * *

Duna gyoy binuang nga gihimo kanang kompaniya nga imong gitrabahoan. Nganong ginunting nga calendar man ang ilang gigamit isip O.R.? Dili ra ba gyod na mahimo. Magukod sila sa BIR nianang kalakiha. Unsa man diay kanang kompaniyaha? Walay kompletong lisensiya? Wala mokuha og TIN?

Bahin nianang pay slip nga imong giingon, sayop ang giingon sa kompaniya nga imong gitrabahoan nga walay kompania nga mo-issue og pay slip. In fact, sa matag dawat og suweldo, ipataban gayod ang pay slip. Gawas sa payroll nga pirmahan sa empleyado, duplikado usab ang pay slip nga pirmahan, ang usa ibilin sa kompaniya ug ang laing kopya maoy huptan sa empleyado. Ako kaniadto miagi usab sa pagpangempleyo ug may pay slip gayod kami matag tingsuweldo.

* * *

Basin kolorum gayod kanang kompaniya nga imong gitrabahoan mao nga dili maka-issue og pay slip. O ba kaha wala mosubay sa hustong paghatag sa suholan segun sa gilatid sa balaod kanang maong kompaniya mao nga dili sila mo-issue ug pay slip sa kahadlok nga may usa kaninyong mga empleyado nga makahunahuna pagdangop sa labor.

Makasimpatiya sab ko sa gibuhat sa kompaniya nga imong gialagaran nganha kanimo nga gitangtang ka sa trabaho sa walay igong hinungdan. Wala ka man kaha makasala sa maong kompaniya nga maingon tang ground for dismissal? Luoy kaayo ka. Ang maayo mong buhaton mao nga mosang-at ka og illegal dismissal batok sa kompaniya nga mipalagpot kanimo sa trabaho. Wala silay legal nga hinungdan sa pagtangtang kanimo. Panalipdi ang imong katungod isip usa ka empleyado.

Ayaw gayod i-tolerate ang pagpangabuso sa mga employer nga manikas sa kusog sa mga anak sa singot aron dijli sila magdasa.

(Sumbong ug reklamo? Text sa 0910-8105522)