Bahin sa lisensiya

Gikan sa cellphone number 0918-4449864: "Good day, Sir. Mangayo lang unta ko og idea or advice. Nag-drive ko og PUJ nga nagrota og Minglanilla-Basak. Gidakop ko sa task force kay ang akong franchise confirmation man lang una aron makabiyahe kay expire na man ang franchise. Unya gi-impound ang PUJ. Wala dad-a ang akong lisensiya kay nadala lang nako og hangyo. Dili apil ang akong lisensiya. Dihang gilukat na sa tag-iya ang PUJ, ipasurender sa LTO ang akong license ug suspensohon kog 90 days. Unya di na kuno ko maka-renew kun di nako isurender. Tinuod ba kini? Ako si Rodelo Alforque." -- (December 14, 2006 -- 15:11:15)

Una sa tanan, mangutana lang ko kon giisyuhan ka ba og TOP sa nagdakop nimo. Atua man didto gibutang ang mga kalapasan nga imong nahimo. Angay ug matarong lang nga i-impound ang sakyanan kay expire na man kaha ang franchise niini. Kanang bahin sa imong lisensiya, tingalig lain na sab na nga estorya. Sutaa didto sa TOP kon may kalapasan ka bang nahimo nga naglambigit sa imong lisensiya.

Usahay ra ba dunay binuang diha sa LTO ilabi na kanang mga kawani nga gustong manapi. Manghinaot lang ta nga kining nahitabo nimo walay sambog nga bulok sa binuang. Ang maayo mong buhaton mao nga mangayo kag dugang katin-awan gikan sa LTO kon nganong ipasurender pa man ang imong lisensiya ug unsang hinungdan nga dili ka na maka-renew kon dili mo kini buhaton. Human mo makuha ang ilang katin-awan, text pag-usab nako kay ato kining aksiyonan kon unsay atong mahimo.

* * *

Sa laing bahin: "Good day. Naa lang koy ipaabot nga reklamo kabahin sa trip cutting sa mga multicab nga magbiyahean sa Minglanilla ug Naga. Basta 6PM na gani ang signboard nila Tabunok na lang or Lawaan." -- 0916-3777177 (Dec. 15, 2006 -- 16: 24:38)

Mao bitaw kiniy sakit sa ubang driver kay dili mosubay sa gilatid nilang rota. Pero bentaha na lang kanang mag-signboard daan og Tabunok o Lawaan kay dili man kita mahinayak og sakay. Ang pait mao kanang mag-signboard gyud og Naga o Minglanilla unya dili diay molahos. Haskang hasola. Mao kiniy angay ireklamo nato ngadto sa LTO.

* * *

(Sumbong ug reklamo? Text sa 0910-8105522)