Aduna untay laing mahinungdanong lakaw si Joe apan sa kalit lang, napakgang kini tungod kay dunay anak sa iyang silingan nga pagadalhon sa usa ka Ospital og dili siya makabalibad niini. Busa gigamit ang iyang sakyanan ug iyang gidala ang maong bata sa ospital nga dunay gilay-on nga 50 ka milya. Sa maong biyahe ang maong bata nangutana kang Joe: "Ginoo ka ba?" Si Joe mitubag: "Dili apan nganong nakapangutana ka man niana?" Ang bata mitubag: "Nag-ampo man gud si mama nga unta tabangan mi sa Ginoo aron ako madala sa ospital. Apan kon dili ka Ginoo naglihok gyud ka alang niya sa?" Ug si Joe mitubag: "Mao gyud ug molihok pa gyud ko maayo...."
Pamalandong
Yanong pangutana sa usa ka bata ngadto sa usa ka hamtong nga tawo. Apan kini timailhan lamang nga ang maayong panig-ingnan maoy makapahimo sa usa ka tawo nga makasinati sa Diosnong Presensiya pinaagi sa paghimo sa kaugalingong kinabuhi ingon nga buhing timaan sa kang Kristong gugma.