Suma pa sa mga imbestigador sa sunog, rebentador nga gipabuto sa usa ka bata sud sa dakong tindahan maoy hinungdan sa pag-ulbo sa makalilisang nga sunog.
Isipon ta nga usa ka "wake up call" kining nahitabo nga sunog sa silingan natong dakbayan. Duna kitay istrikto kaayong kasugoan bahin sa pagpamaligyag pabuto ug uban pang pyrotechnic products sa mga tindahan. Ug maayong pahimangnoan ang mga tag-iyag tindahan bahin niini.
Maayong susihon pag-usab sa mga taga fire department kon ang mga kasuguan bahin sa pagbaligya'g pabuto gituman ba sa hingpit.
Adunay pagtulun-an nga mapupo sa trahedya nga nahitabo sa Ormoc ug ato kining pahimuslan alang sa seguridad kun kaluwasan sa atong katawhan.
Sa laing bahin, among pahasubo ngadto sa mga banay nga nawad-an og minahal sa kinabuhi gumikan sa sunog.