Hangyo lang

Midaku na pag-ayo ang isyu kabahin sa pag-insister sa pamilyang Quisumbing nga gunitan ang luna nga iya sa kagamhanan sa Mandaue nga buot na unta nga bawion aron tukoran og National High School.

Daghan ang nangindahay nga unta maluoy na si Mr. Norberto Quisumbing og iya na lang itugyan pagbalik sa Mandaue ang luna nga gipaabangan kaniya og P1,000 ang tuig.

Klaro man usab kaayo nga wala niya gamita ang maong luna basi sa gikasabotan diha sa kontrata. Ang kasabotan mao nga gamiton ang luna isip mini park, apan wala kini tumana.

Ang reklamo sa mga lumulopyo sa Mandaue mao, nga ang luna gigamit ni Mr. Quisumbing sa iyang negosyo isip display center sa iyang mga baligya nga motorsiklo.

Nagtuo hinuon ko nga pinaagi sa mga mabugnaw nga paghangyo, malukmay ra si Mr. Quisumbing og itugyan ra niya balik sa Mandaue ang luna aron kapahimuslan sa kadaghanan.

Kon dili niya kini iuli, nabalaka ko nga makadaut kini sa iyang dungog, ilabi na kon matinuod nga ang iyang pamilya dunay laraw nga mopapili sa mga pwesto sa kagamhanan karong eleksyon.

Dunay mipadala og text message kanako nga nagkanayon nga dili maminosan ang kaadunahan ni Mr. Quisumbing kon itugyan niya pagbalik sa Mandaue ang maong luna.

Bitaw, husto gyud. Mahimo pa nga dalaygon si Mr. Quisumbing kay ang luna nga giinsister niya nga gunitan mahimo na man nga tukoran og tunghaan og kapahimuslan sa kadaghanan.

* * *

Dagkoa og kita sa mga tigbaligya og litson, karne ug uban pang mga palaliton.

Nag-aso-aso ang mga order sa litson sa mga nag-unang baligyaanan dinhi sa Sugbo. Sa mga opisina sa gobyerno, sama sa korte, walay tarong trabaho gikan pa niadtong Huwebes.

Basta kay takulahaw lang nga nahimong Karaoke joints ang mga court branches. Duna gyuy mga Karaoke Sing-Along nga giabangan atol sa ilang kalihukan.

Kaming mga court reporter walay balita kay unsaon, wala may mga hearing. Pero, sagdi lang kay dili man kini pirmi.

Kagabii, Christmas party namo sa DYLA, unya karong gabii sa Freeman na sab.

Duna gyuy Karaoke Sing-Along nga giabangan alang sa kalihukan namo karong gabii. Mga prempyo dagko kuno kaayo.

Buyno, kadtong mga tag-as og pressure sa dugo, angay usab nga magbantay. Ayaw mo og palabi'g kaon og litson.

* * *

Nalipay ko pagkasayod nga dunay carnival nga gipahigayon dinhi sa dakbayan, sama sa Ferris wheel ug uban pa, kay makalingaw kini sa kabataan.

Apan ang problema mao nga anaa kini gibutang sa dapit nga lisud kaayo ang parking sa mga sakyanan. Ang nindot kon didto nila kini gibutang sa Plaza Independencia.

* * *

Nagtuo ko nga dili makatuman ang demolition team sa paghawan sa mga aseras sa dakbayan gikan sa mga illegal sidewalk vendor.

Bisan og si mayor Tomas Osmeña mihatag na og "go signal" nga dili siya magsapayan nga dunay demolition panahon sa pasko, dili gihapon molihok ang mga sakop sa SPEED.

Hinuon, katungdanan usab sa mga lider sa kahugpongan sa mga vendors ang pagtan-aw nga ang ilang mga sakop wala na moabuso nga nakababag na sila pag-ayo sa mga lumalabay.

Kon higpitan nila ang ilang mga sakop, modayeg kanila ang katawhan, dili sama karon nga magkagot ang ngipon kay ang pag-estar nila diha sa aseras nakatampo sa kahuot sa maong dapit.