Ang pinaskohan

Daku kaayo ang akong kalipay kagahapon nga bisan sa akong kakabus nakahatag ko og bisan gamay lang nga pinaskohan ngadto sa usa ka tiguwang nga namasko didto sa among dapit.

Samtang nanilhig ko sa among nataran - kay mao man g'yoy akong batasan nga manglimpyo sa palibot matag buntag - may miabot nga tiguwang-lalaki nga nagsungkod ug hinay na nga makalakaw.

Sa hinay nga tingog, iya kong giingnan nga mangayo siya og pinaskohan. Mitangdo dayon ko ug gikuhaan nako siya og T-shirt ingon man gihatagan og kwarta nga sarang iyang ikapamahaw.

Ako unta nga giagad ang tiguwang nga mamahaw - kay naluto na man ang tinuwa nga barilis - apan matud sa tiguwang nga human na siya og kaon.

Samtang naglakaw nga hinay kaayo ang tiguwang palayo gikan sa akong nahimutangan, gihakop pa gyud ko og kaluoy kaniya mao nga giapas nako kini og gidugangan ang gihatag ko nga sensiyo.

Sa laktud, pagka alas 12 na kagahapon, nakit-an nako ang maong tiguwang nga daw sa nag-aginod didto sa D. Jakosalem duol sa opisina kaniadto sa Veco.

Kay nagsul-ob na man ko og tarong nga sapot ug nag-sunglasses, wala na makaila kanako ang tiguwang.

Apan dihang ako siyang giingnan nga ako kadtong mihatag kaniya og T-shirt ug kuwarta nianang buntag, pwerteng lipaya sa maong tiguwang.

Giusban god ko niya pagpasalamat makaduha gyud ka higayon. Nasabot nako nga walay laing mihatag kaniya og putos mao nga wala siya makalimot sa akong pagpahinumdom.

Gituki ko kini aron nga madasig kadtong uban sa paghatag og pinaskohan sa mga tawo nga angay'ng kaloy-on ug hatagan sa kaluoy atul ning panahon sa pasko.

* * *

Kapin sa 400 ka buotang draybers sa mga public utility vehicles, sama sa passenger jeepneys ug mga taxi ang nakapahimulos sa libre nga medical check-up nga gipahigayon sa Task Force Alpha sa Land Transportation Office kagahapon.

Ang presidente sa task force Alpha nga si Joe Mendaros mipahibalo kanako nga 360 ka gift packs ang ila usab nga giapod-apod sa mga buotang drivers.

Ang ilang sistema mao nga gipara nila ang mga PUV's ug gisuta kon kinsa kadtong mga draybers nga nagtuman sa lagda, sama sa pagsul-ob og uniporme, nagsul-ob og sapatos ug nagdala sa rehestro sa sakyanan nga ilang gimaneho.

Malipayon ang mga draybers kay napahimuslan nila ang libre nga serbisyo sa Task Force Alpha. Dunay drayber nga miingon nga, dili ra diay dakop ang nakat-onan sa task force.

Matud ni Joe nga kining maong kalihukan gihimo na usab nila sa miaging tuig, ug gipaabot nga palapdan pa karong tuiga.

Human sa ilang medical mission kagahapon, gisunod nila ang pagpahigayon og Christmas party didto sa usa ka kan-anan sa dakbayan sa Mandaue.

Usa ko sa ilang giimbitar sa ilang party. Awhagon nako ang mga sakop sa task force Alpha nga unta mopaspas sila sa pagpanakop karong sunod tuig. Ok ba?

* * *

Maghisgot man gyud ta og Christmas party, karong Sabado ang editorial department sa Freeman, magpahigayon sa bongga nga party.

Gipahibalo kami ni news editor Quennie S. Bronce nga magkuha gyud kuno kami og Karaoke aron maila ang abilidad sa mga reporters ug editors sa pag-awit.

Maayo unta og maluoy ang Santo Niño nga mawala na ang pagka pagaw sa akong tingog para maka-indigay ko sa mga banggiitan kong mga kauban.

Nahimong bongga ang among party kay atul sa Christmas party sa tanang mga kawani adtong Disyembre 16, ang editorial department maoy migawas nga mananaug sa indigay sa pasundayag og nakapremyo og P18,000.

Ang uban usab nga mga department, duna usa'y iya-iyang party.