Cellphone nga kinawat nakit-an sa tindahan

Nia pay laing reklamo nga akong nadawat gikan sa usa ka magbabasa kang kinsang anak nabiktima sa panguot. Nadala gyud sa mangunguot ang cellphone nga 7250 sa iyang anak. Pagkaugma, miadto ang iyang anak sa tindahan nga gireklamo usab sa daghang texters kay mamaligya og gubaon nga cellphone, aron mopalit og bag-ong cellphone. Naunsa ba nga nakita man niya kadtong iyang cellphone nga gikuot didto sa maong tindahan. Nakugang siya pag-ayo.

Aron inyong masabtan pag-ayo, akong ipatik ang katibuk-an sa iyang text nga nagkanayon: "Nakabasa ko karon sa imong lindog about sa tindahan nga mamaligya'g gubaon nga cellphone. Usa pod ang akong anak sa nabiktima nianang tindahana. Nakuotan to siya og cellphone nga 7250 sa usa ka mall. Pagkaugma nangita sila og ipuli sa iyang unit. Unya misulod sila diha sa maong tindahan (nga mamaligya'g gubaon nga cellphone). Nangita sila og cellphone nga 7250 pero walay display ang tindahan. Niingon hinuon ang taga tindahan nga naa silay 7250 pero giayo pa nila.

"Mao to nga gisuwayan nila og tan-aw ang maong unit. Pag-open nila gitan-aw dayon nila ang serial number kay nagduda ang akong anak nga ang iya gyod tong unit, kadtong gikuot. Sus, mao man gyud ang serial number kay natiman-an man niya ang numero. Nagdala man sila sa karton nga gisudlan niadto nga unit kay gikan man sila sa NTC niadtong higayona para ipa-block ang maong unit. Pero pagkahibawo niya nga iyaha tong unit ang gipakita sa taga tindahan, iya dayong giangkon. Miingon ang tindera nga gipa-trade in kuno to sa usa ka babaye unya dili gyud nila ihatag. Mao to nga nigawas sila ug nanawag og polis. Pero baglik nila sa tindahan wala na ang maong unit kay matud pa sa tindera gikuha na og balik sa nag-trade in niini. Gipa-blotter na hinuon nila ang maong hitabo." -- 0918-5664359 (Oct. 8, 2006 -- 08:11:07)

Dili lang una ko mokomentaryo kalabot ning maong text. Ang akong ikasulti mao nga angay subayon ug susihon sa taga DTI kining maong sumbong. Maayo usab unta kon mokooperar ang ubang may awtoridad niini. Dili man god layo sa tinuod nga posibleng may mga tindahan og cellphone nga nakigkunsabo sa mga kawatan ug mangunguot.

* * *

(Sumbong ug reklamo? Text sa 0910-8105522)