Dakung sayop

Dili g'yod maayo nga ang mga amerikanhong sundalo nga makahimo og salaod dinhi sa nasud, adto ra itugyan sa ilang mga labaw inay nga prisohon kini sa atong mga bilanggoan.

Tabla ra nga kuwang og pagpakabana ang atong mga opisyal sa kagamhanan aron kapanalipdan ang katungod sa atong mga lumulopyo nga mabiktima sa pangabuso sa mga langyaw.

Kadtong mga representante sa kagamhanan nga apil sa pagmugna sa Visiting Forces Agreement maisip nga " mitila sa lapalapa" sa mga langyaw.

Maayo unta kon kadtong maong mga opisyal sa kagamhanan nga miuyon lang sa maong kasabutan, maleksyon kon dunay ilang sakop sa pamilya nga maabusohan sa mga langyaw.

Magkagot ang akong bag-ang nga mag-hunahuna sa nahitabo niadtong usa ka koleheyala nga giamong-amongan sa usa ka sundalo nga Amerikano.

Unya, human gikonbikto sa hukmanan sa kaso nga pagpanglugos, ang kagamhanan miuyon lang nga adto kini ibutang sa "custody" sa iyang mga opisyal og dili sa prisohan.

Unsaon, anaa sa Visiting Forces Agreement nga mentras wala pay "final judgment" sa kaso, dili mahimong prisohon ang maong mga sundalo nga Amerikanhon.

Karon, kay ang mga sundalong Amerikanhon moapelar pa man sa hukom sa huwes, buot sa mga opisyal sa atong kagamhanan nga itugyan una ngadto sa kagamhanan sa Amerika ang maong manlulugos.

Usahay bitaw, kining mga utokan mahimong "bogo" tungod sa subra nila nga paghangad sa mga langyaw.

Wala malilong kanato nga daghan sa mga Filipino nga taas kaayo og panan-aw sa mga Amerikano nga magsuroy-suroy, bisan og nagsul-ob lang kini og purol.

Diha sila nasayop. Ang tawo nga makahimo og sala angay nga silotan tukma sa nahimo niyang salaod. Kay ngano, ug kita moadto sa ilang nasud hatagan ba usab nila og susamang pagtagad?

* * *

Pagkadaghang taxi driver nga angay'ng dakpon, ilabi na panahon nga daghan kaayo ang mag-ilog sa pagsakay sa ilang mga sakyanan.

Nasinati nako kini kaniadtong miaging gabii. Naguba ang akong sakyanan ug mao nga mosakay na lang unta ko og taxi aron mopalit og pyesa didto sa suki nakong baligyaanan og spareparts didto sa Katipunan.

Abi ninyo og unsay nahitabo? Wala g'yod ko makasakay. Daghang mga taksi nga akong gipara kay "vacant" man ang suga sa ilang "top-load" apan duna diay mga pasahero.

Nahibaw-an nako nga ang mao diay'ng mga taksi wala mo-down sa ilang metrohan kay migamit sila sa "sabot-sabot" nga pangayoan ra nila og presyo ang mosakay kanila.

Nakatuaw ko sa akong kaugalingon nga angay g'yod nga tudloan og leksyon kining maong mga drayber.

Misamot nga naghinam-hinam ko nga mahimong deputized agent sa Land Transportation Office ubos sa Task Force Alpha nga gidumala ni higalang Joe Mendaros.

Gusto ko nga maleksyon kining maong mga abusadong drayber pinaagi sa estrikto nga pagpatuman sa mga balaod sa trapiko.

Sagdi lang, moabot gani ang higayon nga mahimo na kong sakop sa Task Force Alpha, madisiplina g'yod kamong mga abusadong drayber.

Kadtong mga drayber nga madakpan og kusog kaayong manuborno, labaw pa nakong tudloan og leksyon pinaagi sa pagpasaka kanila og kasong kriminal.

Mao nga ayaw g'yod kamo pagkasayop sa inyong pagmaneho nga anaa ko. Kana kon mahinayon nga matugotan nga makaserbisyo ko pagtul-id sa mga hiwi nga batasan sa mga abusadong drayber.