Mayr’ong isang writer na ubod ng galing
kahi’t anong paksa ay kayang sulatin;
Siya ay mabait -— hindi siya sakim
sapagka’t busilak ang kanyang damdamin!
Ang writer na ito ay hinahangaan
ng buong daigdg sa kanyang larangan;
Ang kislap ng diwa ay tunay na brilliant
at ang kanyang puso ay pandaigdigan!
Tanging siya lamang sa panahong ito
ang nakasusulat ng paksang ginusto;
Tilamsik ng diwa ay sa isang henyo
kaya publisista na walang tatalo!
Kanyang pahayaga’y The Philippine STAR
kung kaya lumago ay sa kanya utang;
Bata at matanda’y kinagigiliwan -—
ang kanyang panulat ay iginagalang!
May mga okasyong siya’y nangungusap
mga nakikinig humahangang ganap;
Ang bawa’t katagang sa labi ay nulas
ay kapupulutan ng dunong na likas!
Sa mga paksaing ang bayan ay sangkot
ang kanyang panulat ay nakalulugod;
Sa kalaba’t hindi siya’y naglilingkod
pagka’t ang layunin ang bansa’y lumusog!
Kaya nga wala nang hihigit sa kanya
sapagka’t panulat tangi’t naiiba;
Siya’y Pilipinong may diwang maganda
kaya kung magsulat —- ginto ang resulta!
Ngunit isang araw siya ay tinawag
ng Poong Bathalang kadluan ng lahat;
Ang sabI ng Diyos: "Halika na Pantas —
ngayo’y sa langit Ko ikaw magsusulat"!