Manakop duol sa Oriente

Niining bahina sa akong lindog, nakahukom kong hatagan og pagtagad kining usa ka text message nga akong nadawat gikan sa usa ka nagpakabanang magbabasa. Kining iyang gisumbong, kon wala ko masayop, gipadangat na kini kanako sa laing texter ug napatik na dinhi sa atong lindog pipila ka bulan na ang nakalabay. Apan hangtod karon padayong aktibo pa diay gihapon ang tawo nga gireklamo kay nakadawat na man usab ako og laing reklamo.

Ang text reklamo nagkanayon: "Good day, sir. Naay usa ka mananakop duol sa Oriente. Kalit lang mosakay sa sulod sa taxi ug dakpon kunohay ang driver. Unya mangayo og P50 kada taxi nga iyang masakyan. Daoton nang tawhana, ambot polis ba na siya. Di ra ba mobadlong or di ka sultihan kon unsay imong sala o violation nga gidakop ka man. Kon nakalapas ba ka og rule sa pag-driver, wa siyay ipasabot. Moingon dayon nga kon lukaton ang imong lisensiya dagko kunog multa maong sabot-sabot na lang." -- 0906-7245197 (Nov. 20, 2006 -- 21:29:05)

Angayan ilhon kon polis ba o dili kanang maong manakop. Kon polis man gayod kana siyang tinuoray, labing maayo nga i-report kanang iyang gihimo ngadto sa mga opisyal sa kapolisan. Nanimaho man gong panguwarta alang sa kaugalingong bolsa kanang iyang gihimo. Dako kanang binuang.

Kon manakop gani, angay pasabton ang gidakop nga driver kon unsay hinungdan nganong gidakop kini. Naa man goy ubang mananakop nga moingon lang dayon: "Ayaw na lang og pangutana kay nasayod ka na sa imong violation." Kahanggaw! Unsaon pagkasayod nga wala man pasabta.

Ang mananakop nga makadakop og driver sa pribado o publikong sakyanan angay gayod moisyo og citation ticket o ba kaha TOP. Dili kay sabot-sabotan lang. Dako kining binuang. Dili maayong i-tolerate kini. Ang akong ikasulti mao nga angay gayod mangisog ang mga driver sa pagtaho sa binuhatan niining tawhana ngadto sa mga awtoridad. Kon ila lang kining pasagdan, sila ra usab ang mapuwerhisyo.

Labing maayo sab nga monitoron sa mga awtoridad kining maong reklamo kay dili kini ang unang higayon nga nakadawat kitag sumbong nga ingon niini.

(Sumbong ug reklamo? Text sa 0910-8105522)