Ang iring ni Senyora
Adunay usa ka senyora nga dunay usa ka gamay'ng iring. Nindot ang maong iring ug ang kaanindot niini maoy nagtukmod sa senyora nga iya kining atimanon. Lamian ang pagkaon niini ug kanunay niya kining ligoon. Nidaku ug nidaku ang iring. Nagkadaku usab ang mga kinahanglanon niini. Tungod sa dakong pagmahal ug pag-amoma, ang senyora usahay mahikalimot na lang sa iyang kaugalingong mga panginahanglan. Apan bisan pa niini, padayon niyang itupad og higda ang pinanggang iring. Nidaku kini ug nidaku hangtud nga ang iring na lang ang makahigda sa higdaanan sa senyora. Nagkadaku usab ang mga panginahanglan niini. Sa kaulahian, ang iring nitambok sa hilabihan ug ang senyora niniwang pud sa hilabihan.
Ang dili kontroladong pagmahal maoy magdala usahay sa nagmahal ngadto sa iyang kaugalingong kalaglagan. Dili dautan ang paghigugma apan nagpasabut usab kini og husto nga pagtimbang-timbang. Kay ang bisan unsa nga maghinobra, dili gyud maghatag og kaayohan.