Hotel rates

Dunay mga reklamo batok sa pagsaka sa bayranan sa mga hotel dinhi sa Sugbo, ilabina inig sugod sa Disyembre, hangtud na sa pila ka semana tapus sa Asean Meet.

Mao kini ang epekto sa supply and demand. Gumikan sa pagdaghan sa demand, kay lagi, modaghan ang magkinahanglan og mga hotel accommodations before and after the summit, natural pasakaan gyud sa atong mga hotel operators ang ilang mga bayranan.

Una sa tanan, negosyo ang pag-operate og mga hotel. Dili ni public service. Gani ang mga hospital ug mga simbahan, apil mag negosyo sa parking. Daginot.

Mobisita kag pasyente, o ikaw mismo ang pasyente, bayad kag pila ka libo, sa imong pag-admit, apan pabayran sad gyud ka sa imong pag-park. Pastilan, commercialized na gyud ang tanan.

Nisamot na gyud ka hakog ang tawo, subra na kaayo ang pagka-kalibutanon. Unya, pakapinan pa gyud sa mga watch-your-car big men. Doble imong gasto sa imong pag-park.

Sa mga simbahan sad, gawas nga mobayad ka sa overnight parking (morag OK lang ni), mag-inilogay dayon ang mga watch-your-car boys and men pagbantay sa imong sakyanan aron di karnapon. Of course, for a fee.

Mao sad karon ang nahitabo sa atong mga hotel. Pahimos gyud. Kusog ang demand, ug medyo kuwang ang supply. Wala tay mahimo ini. Matud pa, di nato ma-repeal ang balaud sa supply and demand. Bahala nag ma-discouraged ang uban pag-anhi sa Sugbo.

Apan, yuna pa, bisan kun wala pay summit, daan nang mahal ang atong mga hotel rates dinhi. Hinumdom ko nga usa sa among buyer, Canadian, kada anhi niya sa Pilipinas ug ngani sa Sugbo, mo-express gyud sa kamahal sa atong hotel rates dinhi. Maoy hinungdan nga tagsa ra sila ka adlaw dinhi, ug adto sa Thailand, mo-spend most of the days and weeks, sa ilang pag-biyahe.

Mahal ang atong mga hotel rates. Dollar ang rates. Kitang mga Pinoy, di gyud ka-afford. Ambut pila lang kaha ka Sugbuanon ang nakachek in sa Shangri-La, sa Hilton, o sa Waterfront. Ang mga dagkung nogosyante ra, ug ang taga-gobiyerno tungod kay di man sila ang mobayad, kita man.

Mao nga Dro, ayaw na lag reklamo diha. Wala tay mahimo batok sa kamahal sa mga hotel rates dinhi sa atong Sugbo.