Ang pag-awhag gihimo tungod sa nagpadayong reklamo sa publiko nga gikawat ang kuwarta nga ilang gisud sa sobre nga ilang gi-mail.
Daghan nang higayon nga gihimo sa Philpost ang maong awhag apan morag wa lang kini tagda kay nagpadayon pa man gihapon ang reklamo nga nawad-an silag kuwarta sa koreo.
Ang mga nagpatronisar sa koreo maoy makatabang sa pagpahunong niining pagpangawat og kuwarta sa postal service. Mosanong sila sa awhag kun pasidaan sa postal officials sa dili pagsukip og kuwarta sa ilang suwat kay unsa may kawaton kon walay kawatonon.
Ning umaabot nga panahon sa Pasko gipaabot nga daghan gihapong mga kaigsuonan nato ang mosalikway sa pasidaan sa Philpost. Nahimo na kining tradisyon ang pagsukip og cash gifts sa Christmas cards. Hinaut unta nga undangon na kining maong tradisyon aron maputol na kining mga pagpangawat sa kuwarta sa koreo.