Armas baligya?

Kun tag-iya ka gani og pusil, ayaw g'yod pagsayon-sayon nga itugyan mo lang sa tumang kasayon ang maong hinagiban ngadto ni bisan kinsa.

Pananglit imong ibaligya, ayaw ihatag ang armas hangtud nga ang maong tawo nga mopalit niini hatagan og "go signal" sa Camp Crame nga makaangkon og armas.

Peligro kaayo nga ang armas gamiton og binuang, sama sa armas nga gipanag-iya ni PO1 Eddely Malata sa Fuente Osmeña police station, nga giingong maoy gigamit pagpatay sa usa ka moneylender.

Ang armas ni Malata, malagmit personal niya nga gipanag-iya, gitugyan niya sa police asset nga si Troy Diago aron pangitaan og mopalit. Pagkadakung sayop ni Malata.

Usa kini sa angay'ng tan-awon sa kadagkoan sa kapolisan, ilabi na sa mga tagdumala sa Firearms and Explosives Division kay si Malata nakahimo og kalapasan.

Buyno, kay PO1 pa lagi maingon nato nga tingali wala siya masayod sa lagda, apan ang balaud nagkanayon nga "Ignorance of the law excuses no one."

Sayonan ka, kun tinuod ang report nga ang maong armas maoy nagamit pagpatay ni moneylender Pilar Hernandez ug sa iyang secretary nga si Viviana Pancho, dakua sa nahimong kadaut.

Si SPO3 Emil Agpalza sa Firearms and Explosives Division diha sa Police Regional Office-7 mipasabot sa tukmang mga lagda nga angay'ng sundon niadtong tag-iya og lisensyadong armas nga gusto na nga mobaligya sa ilang pusil.

Dugay ra ko nga nasayod sa tukmang lagda kay napulo ka tuig ko nga nahimong police reporter sa wala pa ako mabalhin sa Palace of Justice.

Apan bisan og nasinati na ko sa mga lagda, gipakonpirmar nako pagbalik ni SPO3 Agpalza.

Ingon niini. Kun ibaligya nimo ang armas, pangita og buyer, apan ayaw ihatag ang armas.

Kun dunay buyer nga makagusto sa armas, paaplaya usa og lisensya sa Camp Crame, ug ibutang nga ang armas nga iyang aplayan og lisensya mao ang imong armas nga duna nay deed of sale.

Unya na ihatag ang armas kun ang iyang application for firearms license maaprobahan sa Camp Crame. Ang uban god wala man masayod niining maong lagda.

Nagtoo sila nga "automatic" nga mabalhin sa ilang ngalan ang lisensya sa armas pinaagi sa deed of sale. Aw hinoon, si Malata manubag lang sa administrative aspect.

Sa ato pa, ang iyang lisensya rebokahon sa Camp Crame ug ang iyang armas sakmiton pabor sa kagamhanan. Hala, kamong uban diha nga nagplanong mobaligya sa inyong armas, pagmatngon g'yod.

Ang kuyaw diha og ang tawo nga inyong baligyaan sa armas mohimo og mga krimen, unya ingnon nga kaabin kamo sa paghimo nila sa salaud, patay g'yod mo.

* * *

Aron masabtan sa uban, ingon niini ang estorya sa armas ni PO1 Malata.

Gipabaligya kuno niya sa police asset. Ang police asset mitugyan usab niini ngadto ni SPO1 Mateo Yanson kay kuno duna siya'y higala nga nangita'g armas.

Samtang ang armas didto ni Yanson, gipatay sila si Hernandez ug Pancho sulod sa ilang opisina didto sa T. Padilla Extention niadtong Septembre 9.

Nasuta pinaagi sa ballistics test nga ang armas ni Malata nga didto ni Yanson atol sa maong higayon maoy gigamit pagpusil sa mga biktima.

Si Yanson maoy nakit-an nga didto sa sulod sa lending firm sa wala pa patya sila si Hernandez ug Pancho, samtang dunay mga litra nga gisuwat sa ilawom sa lamesa ginamit ang dugo.

Ang mga litra maoy nakagiya sa kapolisan nga matumbok nila si Yanson sa krimen.