EDITORYAL — Duna gyuy galawgaw sa Summit

Diha toy balita sa telebisyon ug radyo diin gipahibawo nga dili na kuno mahinayon ang pagpahigayon sa ASEAN Summit sa Cebu International Convention Center (CICC) tungod kay hangtud ning panahona wala pa gyud makompleto ang kahumanan sa CICC.

Suma pa sa maong balita, adto na ipahigayon ang Summit meeting sa Shangri-La hotel sa Mactan.

Hugtanong gipanghimakak kini sa opisina sa gobernador dinhi ug sa Malacañang kinsa nagkanayon nga walay kausaban ang venue sa ASEAN Summit.

Kinsa may gasugod ug mipadagan sa balitang dili mahinayon ang Summit sa CICC?

"Duna gyuy mga tawo nga gustong lawgawon ang ASEAN Summit ug libuglibogon ang katawhan, ilabi na ang mga Sugbuanon," sumala pa sa usa ka tigpaniid.

Dili na lang unta nato tabyog-tabyogon ang baruto, matud pa, diin nagpadung na kini sa hingpit nga kalampusan. Ato na lang iampo nga mahuman na gyud ang proyekto ug magmalampuson ang dakong kalihukan nga gikatakdang himuon dinhi.