CICC magamit gyud kaha?

Ugmang adlawa mao na gayud ang gisaad ni architect Manuel Guanzon nga iyang itugyan ngadto sa kagamhanang probinsiyal ang Cebu International Convention Center kon CICC. Matuman gayud kaha ang maong saad o mapakyas? Kini ang atong paabuton ugma.

Ang mga kritiko ni architect Guanzon nagduda nga dili gayud mahuman ang CICC ugma ug kun mahuman man, unsa man ang mahuman ang kinatibok-an ba gayud nga edipisyo o ang pipila lamang ka bahin niini.

Way duda nga mahuman gayud ang CICC pero ang atong pangutana kun magamit ba kini unya sa Disyembre 11 ngadto na sa 14 ning tuiga diin ipahigayon ang ASEAN Summit dinhi sa Sugbo.

* * *

Si police Superintendent Melvin Gayotin, acting director sa kapulisan dinhi sa Sugbo miingon sa iyang report nga gipresentar atubangan sa mga konsehal sa siyudad nga miubos ngadto sa 19.55 porsiyento ang crime rate sa siyudad gikan sa Enero uno ngadto na sa Septyembre 30 ning tuiga kun itandi sa maong buwan sa miaging tuig.

Pangutana! Mao gayod kaha kini ang tinuod nga estado sa kriminalidad dinhi sa Sugbo? Wa kaha nimo doktori Superintendent Melvin Gayotin ug sa imong mga tawo ang tinuod nga estado sa kriminalidad dinhi sa Sugbo? Mao na ra ba ni ang naandan ninyo!

Dinhi sa Sugbo maghilak ang adlaw kun walay krimin nga mahitabo, unya miubos ang kaso sa krimin? Motuo ka? Motuo mo? Motuo ta ni Superintendent Melvin Gayotin?

Ibutang ta nga miubos ang gidaghanon sa krimin nga nahitabo dinhi sa Sugbo, nagpasabot ba usab kini nga mitaas na ang crime solution sa atong kapulisan? Nasulbad na ba ang 176 ka mga kaso sa vigilantes? Nahatagan na ba og kasulbaran sa atong kapulisan ang kaso sa mga ordinaryong tawo nga nahimong biktima sa kriminal nga katilingban?

Way pulos ang pag-ubos sa krimin (kana kun tinuod man kini) kun ugaling wa kini masulbad sa atong kapulisan.