ERSS kuno

Kini maoy laing modus operandi nga gipakaylap karon sa mga badlongon sa katilingban pinaagi sa internet. Mahimong adunay lehitimong mga institusyon nga nagpasiugda niining Electronic Random Selection System (ERSS) nga promo apan gisuon usab kini sa mga badlongon nga walay laing tumong kondili ang pagpaburot sa kaugalingon nilang mga bolsa.

Ang estilo mao nga makadawat kag e-mail nga nagpahibalo nga nakadaog ka sa usa ka Free Lottery Automatic Subscription Ticket Game. Aron dili kunohay ka maglibog kon nganong nakadaog ka bisan wala ikaw ing entry niini, pasabton ka nga ang proseso gipaagi sa electronic random selection system (ERSS) diin dili na kinahanglang maghimo ka pa og official entry.

Dako (kuno) nga kantidad ang imong nadaog. Aron pag-claim sa imong premyo, kinahanglang makig-coordinate ka sa gi-designate nilang processing officer alang kanimo. Hatagan ka nilag usa ka designated e-mail address alang sa imong reply. Sa maong e-mail address ka ra gayod puydeng mo-reply kay kon ang e-mail address nga nagpadala kanimo sa congratulatory message maoy imong padad-an sa reply, mo-failure kini. Ambot ug ngano.

Pananglit mosanong ka ug magpadalag e-mail ngadto sa gihatag nga designated e-mail address, mapuwerhisyo ka sa daghang kutso-kutso. Daghan kaayog mga rekisitos. Mora bag ipasapasa ka sa daghang opisina hangtod nga maglibog ka na hinuon. Hasol kaayo ang proseso nga ilang ihatag kanimo.

Ang labing klaro lang mao nga door to door ang delivery sa premyo apan ang winner mao nay mobayad sa freight charges. Gawas niini, ang tax deduction nga 20% abagahon usab sa mananaog. Tungod niini, mangayo sila nimog kuwarta nga dili momenos sa P30,000 alang sa freight charges ug tax deduction sa minilyon nimong daog. Ayaw gayod kamo pagsanong niini tungod kay walay kaseguroan kon asa paingon ang inyong kuwarta ug ma-claim ba gayod ninyo ang gipatuo nga inyong nadaog.

(Sumbong ug reklamo? Text sa 0910-8105522)