Para scholar-ship kuno

Kini maoy laing modus operandi nga anaa mosalir sa internet ug ang kasagaran sa mabiktima niini mao kadtong mga indibidwal nga nagbaton og e-mail account. Angay kini ninyong masayran aron kamo makabantay.

Ang estilo mao nga nakadawat ka og e-mail gikan sa usa ka tawo nga magpailang taas nga opisyal sa usa ka institution nga nagbase sa gawas sa atong nasud nga nagpasiugda og scholarship grant. Patuohon ka nga ikaw ang ilang napili nga tugyanan sa ilang funding alang sa scholarship dinhi sa Pilipinas diin may gigahin sila nga minilyon ka dolyares alang sa maong programa.

Aron (kuno) ika-transfer ang pundong salapi nganha kanimo, ang imong buhaton mao ang pagtukod og usa ka foundation nga rehistrado sa buhatan sa atong kagamhanan. Pagkahuman, mag-abli ka og bank account alang sa maong foundation nga adunay inisyal nga deposito nga dili momenus sa P15,000. Human niini, ipadala mo ngadto kaniya (ang nag-e-mail kanimo) ang account name, account number lakip na ang PIN niini aron ibalhin na nila ang kuwarta ngadto sa maong account.

Ayaw gayod kamog tuo niini. Usa kini sa mga pangilad karon nga mikaylap diha sa internet. Ayaw ninyo patoli ang bisan unsang paukyab sa mga mangingilad aron dili kamo mabiktima sa pagkalingla ug maalaot sa kapolihay. Ayaw paghimog transaksiyon ngadto sa tawo nga wala nimo makita sa personal.

* * *

Niay text nga akong hatagan og luna. Dili na lang ko mokomentaryo sa iyang text. Ipatik ko lang kini aron paghatag og kagawasan sa iyang sentimento.

Ania: "Ang mga baby bus sa SBT ug Citilink, imbes 3 o 2 ra ka pasahero matag lingkoranan, bale 3x3 na ka pasahero matag bangko kay butangan man og extension seat sa tunga. Masuko ra ba kon tambok ang mosakay. Kini ilang himoon kon rush hour. Para namo abusar kini kay lisod kaayo matag sakay namo tungod sa kahuot." -- 0927-5390061 (September 18, 2006-14:22:56)

(Sumbong ug reklamo? Text sa 0910-8105522)