Lisod usbon ang naandan

Nagmaya ang mga mialkontra sa lakang pag-usab sa Konstitusyon sa dihang gibasura sa Korte Suprema ang people's initiative nga gipasiugdahan sa Sigaw ng Bayan ug Union of Local Authorities in the Philippines (ULAP).

Sa botasyong 8-7, midesider ang labaw'ng hukmanan nga ang people's initiative usa lamang ka lakang paglingla sa katawhan tungod lagi sa walay klaro nga signature campaign sa mga nagpasiugda niini.

Hinuon wala pa mawad-i sa ilang paglaum kadtong mga miduso sa people's initiative. Kini tungod kay midesisyon usab ang Korte Suprema nga ibalik ngadto sa Commission on Election ang pagtino sa katinuod sa nahagpat nga pirma niadtong misuporta kuno pag-usab sa Batakang Balaud sa nasud.

Plano sa mga tigpasiugda sa people's initiative nga moduso og motion for reconsideration sa desisyon sa labing labaw nga hukmanan. Ug ning tungora makasiguro kuno sila nga mausab ang desisyon sa Korte Suprema ug mopabor na ngadto kanila.

Walay laing midaug sa desisyon sa labaw'ng hukmanan kondili ang oposisyon ug kadtong misupak sa bisan unsang lakang pag-usab sa Konstitusyon. Kahinumdoman nga bokal kaayo ang taga oposisyon batok sa Charter change nga gipaningkamotan gayud nga matuman sa mayoriya sa Kongreso.

Apan lisod gayud ang pagpatuman sa Charter change ning panahon nga grabe ka init ang krusada pagkwestiyon sa legalidad sa administrasyong Gloria Macapagal-Arroyo. Dili madawat ang katumanan niini sa katawhan kansang mayoridad ang giingong kulang sa pagsalig sa kagamhanan gumikan sa mga akusasyong nanikas kini sa nakalabaw'ng piniliay.

Kon ipamogus gayud sa mga nagpaluyo niini ang katumanan sa Charter change, daghan ang nahadlok nga motumaw na usab ang seryosong politikanhong problema sa nasud. Kini gumikan kay buhaton gayod sa oposisyon ang tanang legal nga pamaagi aron mababagan kini.

Dili gayud makatugot ang taga oposisyon nga makalusot ang Charter change tungod kay kon molampos kini, pildi na usab sila sa laing hugna sa away politikal batok sa administrasyon. Dakong sagpa sa kampanya sa oposisyon pagpalagpot ni Presidente Arroyo sa katungdanan kon molampos ang Charter change.

Daan nang mitiurok ang mga lakang sa oposisyon pagpapha ni Arroyo gikan sa Malacañang pinaagi sa proseso sa impeachment nga giluto sa Kongreso. Apan duha ka beses nga wala sila nagmalampuson sa ilang gisang-at nga impeachment complaint batok sa Presidente.

Apan kon molampus ang lakang pag-usab sa Batakang Balaud, nagpasabot lamang kini nga wala g'yuy dag-anan ang oposisyon sa krusada niini batok sa administrasyon ug peligrong masiak kini gumikan unya sa kahuyang niini ikumpara sa solidong pader sa administrasyon.

Hinuon sa akong tan-aw, lisod gayud makapasar sa katawhan ang lakang pag-usab sa atong Konstitusyon. Kini sa rason nga kulang sa lakang pagsabwag sa inpormasyon sa tibuok kapupud-an ang mga nagpaluyo niini ug mayoriya sa katawhang Pilipino ang kulang usab sa pagsabot sa kaayohan nga maani gikan niini.

Sukad nga nahulma ang lakang sa Charter change sa panahon sa administrasyong Ramos, wala ko makadungog nga dunay gipahigayon nga kampanya didto sa kabukiran ang mga tigpaluyo niini. Hinungdan nga ang katawhan kulang gayud sa pagsabot kon unsa ang Charter change ug kon unsa ang epekto niini sa ilang inadlaw nga panginabuhi.

Bitaw, lisod nga usbon pa ang unsa may naandan. Naanad na kita sa kasamtangang klase sa atong pangagamhanan taliwala sa mga nagkadaiyang krisis nga mihapak sa nasud sa nanglabay'ng pahanon.

* * *

Ipadala inyong reaksiyon sa [email protected]