Polis ang magpasiugda

Mga suki, may nag-text kanako aron pagtaho kalabot sa iyang obserbasyon sa ilang dapit. Usa sa iyang naobserbahan mao ang bahin sa mga polis nga nagpabadlong ug mao na hinuon ang nagpasiugda sa kahiwian.

Nia ang iyang text: "Good day, Sir. Nganong sige man gihapon og duty kanang tulo ka polis nga badlongon ug adik? Badlongon kaayo sila. Unya grabeng sugal tong-its sa Guadalupe. Mga polis ang magpasiugda og tari sa oras nga 9PM to 12 midnight. Sir, way nakapa-drug test nianang tulo ka polis? Grabe na man sila ka adik. Naa na sila sa MPG, panggabii ang duty." -- 0917-6440551 (July 17, 2006 -- 06:02:36)

Gihatag sa atong texter ang mga ngalan sa tulo ka polis nga iyang gipasanginlan nga mga adik apan nakahukom kong pugngan lang una kini in fairness sab ngadto kanila. Ang usa kanila nagranggo og PO1, ang lain PO2 ug ang ikatulo SPO1. Kon dunay mangayo nako sa ngalan niining maong mga polis, andam ako paghatag aron ma-imbestigahan ug masusi kon unsa kini ka tinuod.

Sa akong nasayran, daghan kaayong mga tarong nga polis sa MPG. Busa, aron dili sila maduhig sa pagkaangin sa daotang binuhatan sa pipila nila ka kauban nga nagpabadlong, mas maayo nga sila mismo ang maghinayhinay og gabas sa sungay sa badlongon nilang mga kauban.

Akong klarohon nga wala pa ako motuo sa taho sa atong texter nga ang mga polis mismo maoy magpasiugda og tari. Pero ako sab nakita nga walay sukaranan nga magtumo-tumo og sulti ang atong texter. Mao nga ako kining gipatik ang maong sumbong sa tuyo nga pinaagi niining ubos kong lindog makaabot ngadto sa kasayoran sa kadagkoan sa kapolisan kining maong obserbasyon sa atong texter ug mahimoan kini nilag pakisusi pagsuta kon tinuod ba ang pasangil o dili.

Kon tinuod man ugaling kining pasangil sa atong texter, tulibagbag gayod kaayong pamation. Mao nga manghinaot lang kita nga dili kini tinuod aron dili mosamot ang kasintunado sa kanta sa mga tigpatuman sa balaod.

(Sumbong ug reklamo? Text sa 0910-8105522)