Ang police nga nag LBM

Dili na makagawas-gawas sa kampo sa atong kapulisan si PO2 Junicar Estiñoso human siya gipaubos sa camp restriction gumikan sa paggamit sa bag-ong sakyanan sa kapulisan nga iya sa kagamhanan sa siyudad sa pagsulod sa usa ka motel kuyog ang iyang uyab nga miresulta sa pagkabangga niini ngadto sa usa ka taxi unit.

Sa imbestigasyon nga gihimo girason ni PO2 Estiñoso nga nag LBM siya niadtong panahona hinungdan nga misulod sila sa motel kuyog ang FTP nga si PO1 MC Stuart Balang aron sa pagpabuhagay sa nag-alburoto na niyang tiyan niadtong panahona. Apan si PO1 Balang mitug-an nga nagresponde sila si PO2 Estiñoso og usa ka harassment alarm sa may Sunvalley ug sa ila nang pagpauli sakay na kanila ang babayeng reklamante nga matud pa niya uyab diay ni PO2 Estiñoso ug mideritso sila sa pagsulod sa motel. Ang duha nagpabilin sa motel og siya na lamang ang gipamaniho sa sakyanan paingon didto sa Mobile Patrol Group bisan pa man og wa siya tugoti sa pagmaniho niini sa ilang kadagkoan.

Klaro ug tataw kaayo nga namakak ug dili katuhoan si PO2 Estiñoso sa iyang rason nga giluwatan atubangan sa iyang kadagkoan sa kapulisan. Una kon tinuoray siya nga nag LBM nganong wa naman lang siya moderetso ngadto sa ilang opisina nga unta pipila naman lang kini ka lakang gikan sa QL Motel? Sa kadaghang dapit, nganong sa motel pa gayod nagpabuhagay sa nag-alburoto kuno niyang tiyan si PO2 Estiñoso? Ang tiyan gayod kaha ni PO2 Estiñoso nag LBM o ang laing parte sa iyang lawas maoy nag LBM niadtong panahona? Paminaw nako ang laing parte sa lawas ni PO2 Junicar Estiñoso ang nag LBM tungod kay matud pa ni PO1 MC Stuart Balang may kuyog kining babaye sa dihang misulod sila sa QL motel.

Hinuon wa koy labot kon misulod man sa motel si PO2 Estiñoso kay nag LBM ang iyaha kana gumikan kay pribadong butang na kana, pero ang iyang paggamit sa patrol car nga iya sa siyudad sa Sugbo nga gipagamit lamang ngadto sa atong kapulisan alang sa umaabot nga ASEAN Summit, dinhi angayan na tang manginlabot kana tungod kay ang oras ting trabaho gigamit na sa pagpamiga ni PO2 Estiñoso.

Gani dili lamang makausa kon dili makadaghan na diay gamita ni Estiñoso ang Toyota Innova nga patrol car sa iyang pagpamiga.

Sakto si Mayor Tomas Osmeña nga kinahanglan nga tangtangon sa pagkapolice si PO2 Estiñoso. Para kanako walay luna sa PNP organization kining maong matang sa pagka police kana tungod kay may pagkapolpol kining maong police sa iyang trabaho.

* * *

Human manghambog si kapitan Emok Rupinta sa Barangay Ermita nga 18 na lang ka mga video carera machines ug molimoli ang nahabilin nga nag-operate diha sa iyang barangay ug sa dili pa mapopos kining tuiga mahimo nang video carera free ang iyang barangay, gisupalpal dayon siya sa mga sakop sa CIIB ug uban nga police units dihang 35 ka mga video carera machines ug molimoli ang nasakmit atol sa gipahigayon nga ronda. Gumikan sa mga pagsaway nga iyang nadawat mirason dayon si kapitan Emok Rupinta nga lisod gyod kuno sumpoon ang illegal nga sugal ug drugas diha sa iyang barangay. Porbida nimo "mok" may pa maglana ka og potot. Maayo lang mo pakungon ni Supt. Elisio Castronuevo kanang hepe sa Station 5 nga naa mahimutang diha sa imong barangay kay otro pod nga way nahimo sa illegal nga sugal ug drugas diha sa iyang hurisdiksyon.