Tulis ug shabu

Ang mga kaso sa tulis ug shabu maoy pipila lang sa nag-unang krimen nga nahitabo karon sa atong lokalidad. Samtang dili nato maharos pagtumbok nga ang tanang mga kaso sa tulis nagsumikad ra usab sa pagkayabag sa utok sa mga responsable nga migamit og shabu, daghan kaayo ang atong kaigsuonan nga nagtuo nga ang hinungdan sa daghang tulis karon mao ang pagdagsang usab sa mga adik.

Usa sa nagtuo og ingon niini mao ang tag-iya sa cellphone number 0918-9377976. Miingon siya: "Ang hinungdan sa daghang tulis mao ang mga adis-adis. Naay daghang baligyang shabu diri sa Lacaron, San Fernando, Cebu. Di man gyod madakpan."

Alang nako, dili tingali tanang mga kaso sa tulis naglambigit usab sa drugas. Kuwang kog pagtuo nga ang tanang mga tulisan pulos adik. Pero nagtuo sab ko nga posible nga ang kasagaran sa naghimo niining maong krimen migamit usab og drugas. Kon dili man ang tanan, posible nga ang kadaghanan.

Angay sab susihon sa nahitungdang ahensiya sa atong kagamhanan ang sumbong sa atong texter nga may nagbaligya na og shabu diha sa Lacaron, San Fernando, Cebu. Labing maayo nga susihon kini sa mga awtoridad aron masuta kon tinuod ba kini o dili. Mas maayo usab nga maghimog pagpaniid bahin niini ang mga barangay opisyal ug tanod sa Lacaron aron pagkompirmar kon unsa kini ka tinuod.

* * *

Sa laing bahin: "Maayong adlaw, Sir. Usa ko sa imong suking magbabasa. Naa koy reklamo bahin sa 286. Kon mag-load ko, kuhaon man ang sobra sa katunga sa load labina kon moabot ang text gikan sa 286. Ibanan gyod ang load." -- 0919-3966265 (September 21, 2006 -- 11:44:03)

Mao lagi kini ang nakapait. Hangtod karon wala pa gayod makapasabot ang mga network provider ngadto sa ilang mga subscriber mahitungod niining maong inconvenience. Angay kining hunongon kay dili kini makiangayon ngadto sa mga subscriber. Hinaot nga mobati nag kaikog ang mga provider sa ilang mga subscriber.

* * *

(Sumbong ug reklamo? Text sa 0910-8105522)