Angayang saludohan siya sa tanang Sugbuanon tungod sa bayanihong buhat ni SPO1 Agadier pagresponde sa pagpanulis sa PUJ bisan off-duty unya uban pa gyud ang iyang anak atol sa insidente.
Bisan gibayaw na si SPO1 Agadier tungod sa daghang pagdayeg sa bayanihon niyang buhat, diin mismo si Mayor Tomas Osmeña nalipay kaniya, pabilin siyang nagpaubos sa iyang kaugalingon.
Dinha ko mibilib ni SPO1 Agadier!
Sa pagkabasa nako sa balita sa among reporter dinhi sa Banat News mahitungod sa polis sa Carcar nga mipusil sa usa ka tulisan ug miresulta sa pagkasikop sa laing usa, nasayod na ko nga mo-react gyud si Tomas ug motanyag dayon og promosyon, pahalipay nga salapi, ug tanyag pagdestino dinhi sa Sugbo.
Nag-obserbar lang ko ni SPO1 Agadier unsay iyang reaksiyon. Mibilib gyud ko niya nga wala gyud siya manghambog.
Tiaw mo, makadaghan na diay masabak sa aksiyon si SPO1 Agadier - nakapatay na og wanted nga kriminal ug nakapatay usab og laing tulisan sa PUJ sa Mambaling.
Apan ang iyang pulong "trabaho lang" maoy nakatandog kanako nga makaingon akong "tinuod gyud nga polis" si SPO1 Agadier; polis nga ingon kaniya ang gikinahanglan niining nasura.
Ilabi na dinhi sa Sugbo nga kadaghang pulpol nga mga polis nga maayong pang-ilisan ug ipalabay sa Jolo, angayang anhi si SPO1 Agadier iyawat mapunopunoan ang mga polis nga sama kaniya kaabtik ug kamaisugon mosabak sa aksiyon sa ngalan sa iyang trabaho!
Apan ang hunta probinsiyal sa Sugbo, pinaagi ni Bokal Victor Maambong, napugos paghaon og resolusyon nga nag-awhag sa Land Transportation Franchising and Regulatory Board (LTFRB-7) pagsuspenso sa pagpadagan sa mga taksi nga naggamit og LPG.
Wala ko magduhaduha paghunahuna nga ang nagtukmod sa hunta probinsiyal pagpasar sa maong resolusyon mao kadtong aksidenteng pagbuto sa LPG sa laundry shop sa Mandaue nga mipatay og tulo ka tawo ug miangol og laing 16 ka tawo.
Dinha makita sa mga awtoridad ang aksidente nga mibungkag sa Gene's Laundry Shop unsa diay kakuyaw kining LPG kun patakaan og gamit. Kun ma-intimano, mahisama gyud niadtong babaye nga nasabak sa mga bildo ug uban pang butang gikan sa laundry shop, magutaygutay ang lawas.
Ma-imagine nato unsa pud unya diay mahitabo sa taksi kun mobuto ang LPG tank nga anaa mahimutang sa baggage compartment. Mabungkag gyud tingale.
Unya, unsay mahitabo sa pasahero?
Pananglit may nakatupad nga laing taksi nga parehong naggamit og LPG, dili kaha maapil og kabungkag?
Akong usbon, wala kita makasugat og aksidente nga naglambigit sa LPG-powered nga taksi. Seguro ko nga 'regulated' pa ang paggamit niini nga mismo ang mga operator nagpatuman og hugot nga pag-monitor sa ilang mga taxi units. Nalipay ko nga mismo ang mga operator abtik kaayong nagmonitor sa ilang mga units.
Ang akong gikahadlokan man gud kun managhan na unya ang taksi nga maggamit og LPG. Unya, malisud na ang pagtagsatagsa ug pagpahugot sa monitoring sa mga LPG tank sa luyo sa taksi.
Wala pa karon, apan kanus-a man kita molihok, unya na og adunay masampolan?
Gihangop na sa kadaghanan ang paggamit niining LPG, ilabi na niining mga panahona nga walay puas ang pagsaka sa presyo sa lana.
Busa, kun supakon kanang tinguha pagpasuspenso sa LPG-powered taxi, maayong karon-karon dayon, himuan sa mga hingtungdan nga ahensiya og mga 'measures' nga malikayan ang gikahadlokan sa tanan - nga mahitabo sa taksi ang nahitabo sa Gene's Laundry Shop sa Mandaue pipila ka bulan ang nakalabay.
Dili gyud tuod malalis, daghan na kaayong mga drayber og PUJ nga mga burokinto, hambugero ug daghan mga isog ug dili mahadlok makapanakit og tawo.
Apan ang nahitabo sa traffic enforcer sa Natalio Bacalso dili pa igo nga rason nga mamalit og armas ang kagamhanan sa dakbayan aron ikargada. Ikomparar kana sa mga harassment sa mga traffic enforcer sa kauluhan layo ra kaayo kanang maong insidente sa mga nanghitabo didto sa Manila, apan ang mga lider nato didto wala makahunahuna pagkargada sa ilang mga traffic enforcers.
Nakaseguro ko nga mas mohatag unya kini og problema kay sa sulbad nianang pagpanlupig sa mga traffic enforcer.