Puyde bang pabayran?

Mao kini ang pangutana sa usa ka magbabasa niining lindog kinsa mipadangat sa iyang reklamo mahitungod sa iyang cellphone nga naguba human niya pailisi og casing sa dihang iya kining napalit niadtong Septiyembre 4, 2006.

Aron inyong masabtan, akong ipatik ang tipik sa iyang text: "Gipalitan lang nako og casing ang akong cellphone nga bag-o pa diha sa Colon, pero naguba man ang cellphone pag-ilis og casing. Unsa man angay nakong buhaton? Puyde ba ni nakong pabayran niya. Iya mang giayo pero matud niya nga kon maguba kuno inig-abot sa balay, wa na kuno siyay labot." -- 0919-6534850 (Sept. 9, 2006 -- 11:03:27)

Salamat sa imong text. Dili kaayo klaro sa imong text kon kinsa ang "niya" nga imong gitumbok, ang gipalitan ba nimo sa cellphone mismo, o ang gipalitan nimo sa casing nga imong giilis? Maayo unta kadto kon giklaro pa nimo aron mas specific usab ang atong pagtubag sa imong pangutana.

Kon ang gipalitan nimo sa cellphone maoy gusto nimong pabayron, nagtuo ko nga dili siya maobligar sa pagbayad ilabi na kon dili kini covered sa warranty period sa imong pagpalit niini. Kon kadto pod ang gipalitan nimo sa casing maoy gusto nimong pabayran, morag kuli kining mahitabo ilabi na kon dili nimo kapamatud-an nga siya ang nakaingon sa pagkaguba sa imong cellphone.

Nakasinati na sab kog ingon niana. Naguba ang akong cellphone nga 8210 human nako pailisi og casing didto sa Quiapo, Manila. Mao nga nitagam na ko nianang pailis-ilis og casing aron pagpanindot sa cellphone. Yano na lang ang akong cellphone karon kay ang akong 8210 wala na man nako ipaayo.

* * *

Sa laing bahin: "Attention, mga katawhan sa Sugbo. Ayaw mo pailad nianang lalaki nga magsuroysuroy para mangayo (repair) sa inyong upholster kay dako nang ilad.-- 2770-0914-5094 (September 2, 2006 -- 11:53:13)

Pagbantay gayod kamo sa lainlaing modus operandi sa mga mangingilad. Ayaw dayon kamog salig ni bisan kinsa nga motanyag og serbisyo nga kaduhaduhaan.

(Sumbong ug reklamo? Text sa 0910-8105522)