Ang mga billboard

Suma'a sa atong naandan, isip Pinoy, mao pay atong ilihok human sa hitabo. Mao pay atong ipanguros tapus sa usa ka makusog nga kilat. Mao pay atong ipangandam tapus sa sunog o tapus sa makusog nga bagyo, o tapus sa usa ka aksidente.

Karon, didto sa Manila, gumikan sa pagkahagsa sa daghang mga billboard, nakahatag og dakung kahasol sa uban, ug mikalas og kinabuhi, ang atong gobiyerno, as usual, milihok konohay dayon. Pastilan!

Sulod sa dugay nang panahon, ang atong nasud, naila nga the only country in the world nga gipatuyangan ang pagpabarug og mga billboards, bisag asa, bisag unsay gidak-on, ug wa'ay klarong kalig-onon.

Sa ato pa, basta mobarog lang, okay na. Wa'ay tagad ang gobiyerno, lig-on o dili. Basta makabayad lang.

Hinumdom ta nga sa dihay nasunog nga apartment sa Manila, nag-istrikto dayon konohay ang gobiyerno, inspection dinhi, inspection didto. Nag-iyahay dayog pahaba ang atong mga magbabalaod. Dugay-dugay na to. Karon, huwat na sad tag laing sunog.

Hinumdom sad ta nga karong bag-o, sa dihang, dunay naanod nga mga balay daplin sa sapa, lihok dayon ang gobiyerno, aron kalikayan ang samang hitabo. Ug karon, huwat sa laing baha ug lunop.

Balik sa mga billboard. Dinhi sa ato, utro sad. Nagkompetensiya ang gidak-on sa atong mga billboard. Ug bisag asa nato makita. Wa'a i-regulate sa gobiyerno. Ug lagmit, gumikan sa nahitabo sa Manila, molihok usab ang atong mga konsehal.

Kinahanglan dunay sumbanan kon unsay maximum nga gidak-on, asa nga dapit, dili kay bisag asa lang, bisag unsay gidak-on. Unya, kinahanglan maseguro ang kalig-on. Ug kon unsay mahitabo, ang gobiyerno mao gyuy manubag, tungod kay sila man ang naghatag og permit, ug sila ang nag-certify sa kalig-on.

Hinuon, wa'a pa may nahagsa nga billboard dinhi sa ato. Sama sa naandan, kaylagi, mga Pinoy man ta, maghuwat ta nga duna unay mamatay una ta, molihok. Pastilan!

Karon, gipasagdan lang sa atong gobiyerno ang bahin sa atong kadalanan nga gihimong bodega sa mga dealer sa mga softdrinks, diin sa higayon nga magdiskarga o magkarga sa mga binotelyang imnonon, ilang okopahan ang tibuok lane, sama nga ilang private property. Hinuon, wa'a pa may nadisgrasya. Okay lang! Pastilan, Dro!