Sa pasangil ni Emphasis, nangato silang Cortes ug Solon og salapi bugti sa dili pagpadayon pag-atake sa iyang pagka-tawo sa programa niini sa DyLA matag Lunes hangtod Miyerkules.
Dinha usab sa DyLA mag-programa si Emphasis matag Biyernes sa buntag, ang Kapihan ni Ate Glo.
Ang hitabo nilang Cortes ug Solon maayong himuong abridor sa mga lakang nga himuon sa liderato sa industriya sa panibya pag-usab sa sistema niini, aron sa ingon, dili na masubli pa ang susamang hitabong pagposas sa mga tawong naggamitan sa kahanginan alang sa ilang panginabuhian.
Panahon na tingale nga banwasan sa KBP ang tugkaran niini aron malimpyohan ang industriya sa panibya.
Apan una niini buhaton ang pagpamanlas sa mga badlungon sa kahanginan, angayang tun-an niini nganong naingon niini ang pipila sa atong mga kaubanan sa buhat diha sa panibya.
Pipila sa mga magsisibya ang naglisud tungod sa ka-barat sa mga estasyonan sa radyo paghatag sa mga benepisyo?
Nganong dili makakontrolar ang estasyonan sa radyo nianang mga blocktimers? Aron sa ingon, bisan tuod mamalitay lamang sila og airtime, mahasubay sa lagda ang ilang panibya ug malikay sa susamang hitabo nilang Solon ug Cortes ang mga blocktimers.
Alang niadtong mga tawo nga biktima sa mga binuang sa mga magsisibya o mga peryodista sa pamantalaan, aduna kitay Cebu Citizens-Press Council diin kining inyong pamantalaan, uban sa laing tulo ka pamantalaan ug laing tabloid mga miyembro.
Ang CCPC gituyo pagtukod aron kadtong mga tawong sa ilang pamati nahikawan sa ilang katungod sa pagpanalipod sa ilang kaugalingon diha sa pagpanibya o publikasyon, mahimong moreklamo sa council.
Niadtong buot moreklamo kalabot sa publikasyon sa pamantalaan, mahimong mosulat sa CCPC kang kansang buhatan anaa mahimutang sa Marcelo B. Fernan Press Center sa Ecotech, Sudlon, Lahug, ning dakbayan. Mahimo usab anha moreklamo kadtong moreklamo sa magsisibya sa radyo ug telebisyon, apan ipasa kini ngadto sa KBP alang sa tukmang lakang.
Ang dili andam, segurong tiurok gyud sa pasulit.
Mao kini ang rason nganong gisupak pag-ayo sa mga nursing ang tinguha ni Executive Secretary Eduardo Ermita nga pakuhaon og balik sa pasulit ang tanang nursing students nga mikuha sa katapusang pasulit nga gi-nullify tungod sa panikas didto sa Baguio ug Manila.
Dili kuwestiyon ang kuwarta. Apan ang labing dakong kuwestiyon niini ang moralidad ug legalidad sa pagsubli sa pasulit.
Alang sa mga nakapasar na sa miaging pasulit nga wala makabenepisyo sa giingong 'leakage' sa miaging pasulit, usa ka bukid alang nila ang pag-usab sa pasulit.
Anaa na kanila ang kahadlok nga dili na hinuon makapasar.
Apan kun seguruhon nilang makapasar, laing bug-at nga pagpangandam ang ilang buhaton. Lain na usab nga pag-antus.
Dili na makiangayon.
Saksi ko sa kapait sa mga nursing students pagpangandam sa ilang kaugalingon alang niadtong miaging pasulit. Magtukaw intawon sila pagtuon sa Dunkin Donuts diha sa Fuente Osmeña, mga kapehan ug study centers sa dakbayan aron lang makapasar.
Apan nadaot lang sa panikas didto sa Manila ug Baguio.
Tiaw mo kanang sa report nga atong nadawat, aduna gyuy namatay sa miaging bulan tungod sa 'stress' ug 'pressure' nga gidulot sa bar exam.
Laing report, niadtong katapusang Domingo sa bar exam, akong mga kauban sa college of law maoy nakatayming sa usa ka bar examinee nga naligo sa tubig sa kasilyas sa usa ka kan-anan sa Taft Avenue, atbang sa De La Salle University diin gihimo ang bar exam. Sa ilang tan-aw, nalisoan na sa utok ang maong batan-ong lalaki nga nagpailang taga Mandaue nga gradwado sa abogasiya sa usa ka sikat nga law school dinhi sa Sugbo. Tungod kini sa sobrang pressure sa pasulit nga wala na maantus niini.
Gituki ko kini pagpahibalo kaninyo nga dili intawon lalim ang pagpangandam sa kaugalingon alang sa usa ka pasulit.