Ning pagpasaka na og kaso batok sa mamumuno ni Carmela, garantiya na ba kini ngadto sa mga Sugboanon ug pamilya niini nga makakuha og hustisya ang biktima ug muondang na usab sa iyang pagpanulis ang mamumuno? Muondang na ba sa ilang pagpangita kang Brian Sasan ang atong kapolisan?
Ang pagpasaka og kaso sa mamumuno nga si Sasan dili kini makahatag kanato og garantiya nga hingpit nga makuha sa biktima ang hustisya ilabi na nga wala pa madakpi ang gipasanginlang tulisan ug mamumuno. Taas-taas pang baklayonon sa pamilya ni Carmela aron ilang maabot ang hustisya.
Sigon sa atong batakang balaod, dili makasugod sa pagbista ang mga huwes sa kaso nga ilang gihuptan kon ugaling wala pa madakpi ang akusado, gawas lamang kon nakakuha na og jurisdiction ang hukmanan sa pagkatawo sa akusado, nabasahan na kini sa kaso nga iyang giatubang, wa motunga sa dihang gipatawag alang sa bista sa iyang kaso ug wala niini mapasabot ngadto sa hukmanan ang iyang kapakyas sa pagtunga.
Si Brian Sasan nagpabilin pang gawasnon busa kon masang-at man ugaling ngadto sa hukmanan ang kaso nga iyang giatubang dili pa gihapon makasugod sa pagbista ang huwes nga naghupot sa iyang kaso tungod kay wa pa kini maka acquire og jurisdiction sa pagkatawo sa akusado kay wa pa man kini madakpi sa atong kapolisan.
Busa kon makapagawas na og warrant of arrest ang hukmanan nga nagkupot sa kaso ni Sasan kinahanglan nga pangitaon dayon kini sa kapolisan aron sa ingon masugdan dayon ang pagbista sa iyang kaso. Kon ugaling dili madakpan si Sasan, ang mahitabo, malubong kuyog ni Carmela ang hustisya ug makapaabot na usab kita nga adunay laing isunod sa pagbiktima si Brian Sasan. Manghinaot lang unya ko nga dili anak sa atong mga police dinhi sa Sugbo ang masunod nga biktima.