Trahedya sa Mandaue

Makalilisang nga buto ang nabati sa mga residente sa Barangay Basak, Mandaue City niadtong adlaw nga Lunes nga naatol sa pagtamod sa ika-lima ka tuig nga kasumaran sa pag-atake sa mga terorista sa Estados Unidos. Nabalaka ang publiko nga basin nakasu'd na ang terorismo sa Sugbo. Apan naibtan og tunok ang tanan dihang nahibaw-ang LPG ang hinungdan sa sipang buto nga gigamit sa operasyon sa Gene's Laundry.

Di makatuo ang mga residente nga nakabati sa sipang buto nga ingon niadto ka kusog ug kadako sa kadaot. Wa sab magtuo ang publiko nga pwedeng moresulta sa delikadong sitwasyon ang dili hingpit mag-amping ang katawhan sa paggamit og LPG. Gawas sa mga kabtangan nga nangaguba, nga hangtud karon wala pa masuta kung pila ang kinatibuk-ang danyos, daghang mga kinabuhi ang naangin lakip na ang duha ka mga tawo nga nakalas sa maong trahedya.

Tungod kay duol sa ABS-CBN Broadcast Complex ang nahitabu-an, daling nakaabot sa newsroom ang balita. Apan nagtu-o mi nga ordinaryong pagbuto lang nga walay angayang kabalak-an. Apan sa dihang gipasupot sa DYAB ang report nga nagkanayon nga grabe ang insidente ug may mga tawo nga samaran ug mga kinabuhing nakalas, nagtuo ko nga nagsugod na pagsiaw ang gikahadlokang mga terorista. Salamat ug nasutang walay bisag usa ka ebidensyang nakuha ang mga otoridad nga bomba ang nibuto sa maong dapit.

Pag-abot palang nako sa lugar, nakugang ko sa akong nakita. Ang kaniadto tulo ka nagsikit nga establisamento ilawom sa wala pa hingpit matapos nga edipisyo, karon wala na mahitsura gumikan sa grabeng kadaot nga hatud sa maong pag-ulbo. Nangatang-tang ang kisame, nangabuak ang mga bildo, nabungkag ang mga washing ug drying machines ug nangabuak ang mga samin ug bildo sa mga silingang panimay. Makalilisang ang epekto sa maong insidente.

Apan nabaling ang akong atensyon sa usa ka butang nga gitabunan og sin tunga-tunga sa dalan. Nagtu-o ko nga gitapok sa mga otoridad ang ilang mga ebidensyang nakuha ug gitabunan aron dili mahilabtan sa mga tawo. Nakugang nalang ko dihang kalit lang midagayday ang dugo gikan sa gitabunang butang. Didto pa nisantop sa akong huna-huna nga patay nga tawo diay ang gitabunan. Sulod sa kapin duha ka oras nga nagbuy-od ang patay'ng lawas, ilawom sa init nga adlaw, liboan ka mga tawo ug gatosan ka mga sakyanan nga niagi sa dapit.

Tungod sa grabeng pagkaguba sa nawong ug lawas sa biktima, walay bisag usa ang nakaila sa iyang pagkatawo. Nahibulong ang mga tawo nga nitan-aw sa dapit kung nganong dugay gikuha ang patay'ng lawas gikan sa tunga nga bahin sa kalsada. Matud sa mga pulis, gipaabot pa ang taga SOCO una hilabtan ang bisan unsang butang o patay'ng lawas nga dako og matabang sa pag-imbestigar sa insidente.

Gitakdang moabot karong adlawa sa Sugbo ang mga anak ni Diosdada gikan sa Amerika. Gikwestyon nila ang pagtratar sa ilang inahan nga nagbuy-od sa dalan sulod sa pipila ka oras. Matud sa mga tawo nga naka-obserbar, dili tawhanon ang dugay nga pagkuha sa patay'ng lawas ni Diosdada tunga sa highway Mandaue.

Ang nahitabong trahedya sa Mandaue maoy giisip nga dry run alang sa umaabot nga ASEAN Summit sa Disyembre. Kung tan-awon ug sukdon ang katakos sa otoridad sa pagtubag sa alarma, makaingon ko nga daghan pa og kuwang ang kapulisan ug rescue team sa dakbayan sa Mandaue. Nikabat pa og pila ka oras una hingpit masolbad ang problema sa kahuot sa trapiko nga maoy naka-ingon sa kalangay sa mga ambulansya ug mga pulis sa pagresponde sa insidente.

Gikan sa LPG nga nibuto, nanghinaot ko nga may igong pagtulun-an nga napunit ang mga hingtungdang otoridad ug dili lang magpabiling hagit kanila ang kapakyasan sa operasyon. Mamahimo usab untang responsable ang mga tawo sa panahon sa trahedya pinaagi sa pagtabang nga mahapsay ug paspas ang proseso sa imbestigasyon.