Huyang nga seguridad

Luyo sa gipagarpar sa atong gobyerno nga luwas ang atong mga tugpahanan ug pantalan gikan sa mga tawo nga nagtinguha paghimo og kagubot, di malilong ang kamatuoran nga igo ra tang giulog-ulogan sa mga opisyal sa kagamhanan.

Ang pagpusil patay ni kanhi Biliran Governor Danilo Parilla sud mismo sa barko diha sa pantalan sa dakbayan sa Sugbo diin ang mamumuno iyang kauban pagsakay sa M/V Cagayan Princess gikan sa Leyte dako ning bulilyaso sa seguridad sa atong pantalan nga di ikalimod sa atong gobyerno. Kon ang usa ka yanong gitumbok nga kriminal nga si Eugenio Corpin nga naghambin og pagdumot ni Parilla nakahimo pagsud sa pantalan ug pagsakay sa barko nga dunay armas, unsa na kaha ang mga organisadong grupo sa mga terorista? Seryoso ang implikasyon sa nahitabo ni Parilla tungod kay nagpakita ni nga taliwa sa pagpangandam sa atong gobyerno sa posibilidad nga dunay mga terorista nga mohimo pagpamomba diha sa mga sakyanan sa kadagatan ug sa mga pantalan nalutsan sila sa ordinaryong tawo nga nagtinguha paghimo og krimin.

Angayan nga imbistigahon sa atong gobyerno kon kinsay angayang manubag sa paglusot ni Corpin sa pantalan didto sa Leyte nga nagdala og armas. Unsa may nahitabo sa mga sea marshal sa coast guard nga mouban sa mga biyahe sa barko aron pagsiguro nga luwas gikan sa mga kriminal ug mga terorista ang mga pasahero. Wa bay tulobagon ang kompaniya sa barko nga gisakyan ni Parilla ug sa iyang mamumuno? Di ba katungdanan man unta sa mga kompaniya sa barko ang pagbantay nga way mga illegal nga butang sama sa mga hinagiban nga makasakay samtang maglawig ang barko?

Unsa may gihimo sa mga security guard sa kompaniya sa barko sa dihang ilang girikisa ang mga pasahero nga misakay sa barko sa wa pa kini molarga? Kon istrikto sila sa pagrikisa kon duna bay ticket ang mosud sa barko nganong wa nila masusi si Corpin nga nagdala og armas? Hinaut nga wa matulog ang mga hingtungdang opisyal sa atong gobyerno ug dawaton ang ilang kakuwangan aron kapangitaan og solusyon inay nga molingiw ug ipatoo sa publiko nga way problema.





Pananglitan, ang pagtug-an sa usa ka counter terrorism expert didto sa kaulohan nga nakasud siya sa abyon nga dunay mga dala nga kahimanan paghimo og bomba. Ang maong pamahayag inay dawaton ug susihon kon diin sila nasayop, nangugat hinuon ang mga opisyal sa gobyerno nga responsabli sa seguridad sa tugpahanan nga wa ni mahitabo og namakak ang experto. Ang mga video footage nga gipakita sa experto matinuod og dili angayan ning ikaalarma sa atong mga tinugyanan ug himoan og pakisusi inay nga direktang mosalikway ug moinsister nga luwas ang atong mga tugpahanan. Huwaton pa ba nila nga duna gyuy abyon, simbako lang, nga paulbohon usa sila motoo nga nagkuwang sila sa ilang seguridad?

* * *

E-mail: [email protected]