Palpak na sab

Diay maayong bantayan sa atong kapolisan. Panahon nga mag-raid kamo og panimalay nga inyong gikatahapan nga ang mga nagpuyo nagtago og illegal nga mga butang, siguroa nga dunay witness sa inyong pag-search.

Kini maoy rason nga gi-dismiss ni RTC judge Gabriel Ingles ang kaso nga gipasaka batok sa laing suspetsadong drug pusher nga sila si Dario Dayanan ug asawa nga si Imelda.

Ang panimalay sa magtiayon, ambot diin dapit ang ilang balay kay wala man ibutang sa order ni judge Ingles, gironda sa mga polis.

Ambot unsay nasulod sa ulo sa usa ka polis nga si PO1 Crestito Raboy nga mentras nagsugod na ang search sa silong sa panimalay, misaka man siya sa ikaduhang andana nga siya rang usa.

Dayon pagkataud-taud, nanaug si PO1 Raboy nga nagbitbit na sa lima ka paketeng shabu nga giingon niya nga iyang nakit-an nga gitungtong ibabaw sa aparador.

Wala g'yod masayop si judge Ingles sa pag-dismiss sa kaso nga gipasaka batok sa magtiayon. Kon imong hatagan og gibug-aton ang maong pangangkon ni Raboy, hayan nga maabusohan kini sa mga polis.

Dili imposible nga gi-planted ra ni Raboy ang maong lima ka paketeng shabu kay wala may laing tawo nga maka-witness pagkakita niya sa maong mga gidiling matang sa drugas.

Kamong mga polis, kon mag-raid gani mo og panimalay, pagpauban mo sa mga witness kon mosaka mo sa taas kay magtan-aw kon wala bay laing tawo didto.

Natural sa mga polis nga ilang kontrolahon ang mga tagbalay, kon naay tawo sa taas, pakanaugon aron dili makatago sa mga illegal nga butang nga target sa search.

Apan siguroa nga dunay mga saksi nga uban kaninyo kon mosulod kamo sa taas sa ilang balay aron nga kini maoy makatestigos unya nga wala kamo maghimo og binuang.

Kon dili ninyo plansahon pag-ayo ang inyong kalihukan, sigurado nga maghago-hago ra mo.

* * *

Maayong tun-an sa kadagkoan sa City Traffic Operations Management ang pagdili na sa mga sakyanan gikan sa Citilink terminal nga maka-left turn paingon sa Natalio Bacalso Avenue.

Tan-aw nako mas maayo nga kadtong mga sakyanan nga gikan sa Citilink terminal, ipa-right turn ra g'yod ug adto sila paagion sa Panganiban, dayon Tres de Abril, ug left turn sa Natalio Bacalso avenue.

Karon god, makamugna og traffic congestion ang mga sakyanan nga manggawas gikan sa terminal nga mo-left turn. Aw, tun-i lang kon hain ang mas maayo. Sugyot ra ning ako.

* * *

Apan hain na man ang mga sakop sa task force nga gitahasan pagpanakop sa mga trisikad nga samok kaayo diha sa dalan Katipunan, Labangon?

Ang nakaparat god niining maong mga trisikad draybers kay mosugat sa mga sakyanan. Inigdayon nimo og liko sa Salvador Extention, atubangan sa Cebu City National Science High School, hilabihan ka samok.

Akong balikon, malooy g'yod unta kita sa mga drayber niining maong mga trisikad apan kon ang ilang pagmaneho makahatag na hinoon og peligro sa mga motorista, dili na maayo.

Nasayran nako nga kining mga trisikad operators ug drayber diha sa Salvador dunay ilang kahugpungan. Hisguti ninyo kini atol sa inyong mga tigum aron nga walay moreklamo kaninyo.