Hinaot pa unta

Kaniadtong Huwebes sa gabii petsa 31 sa bulan sa Agosto tulo ka mga bata nga nagpangidaron pa lamang og usa, tulo ug lima ka tuig ang nangapaig human masunog ang ilang panimalay didto sa Madridejos, Alegria, Cebu. Ang patay nga lawas sa usa ka bata nakit-an didto sa usa ka sook sa balay nga nasunog ug gituhoan nga didto kini motago. Samtang ang laing duha ka patay nga lawas sa mga bata wa kini maglagyo sa ilang nahimutangan ug kini nagpakita nga wala mobiya ang maguwang sa manghod niining gibantayan nga gibutang sa duyan. Hinoon suerte ang lain pa nilang igsoon nga nagpangidaron pa lamang og pito ka tuig kay nakalingkawas sa maong sunog.

Ang maong mga bata nga nangatulog na niadtong panahona gibiyaan sa ilang mga ginikanan tungod kay mitambong sa koronasyon diin ang usa sa ilang mga anak nahimong kandidata didto sa pikas sitio sa barangay Madridejos.

Ang kamatayon sa tulo ka mga bata usa ka pagpabaya (to the highest degree) sa mga ginikanan ug ang maong mga ginikanan dili angayan nga pasayloon sa ilang nahimong kasaypanan. Sayonan mo nga sa katorse ka mga anak ni Sulpicio Lastimoso wa gyod siyay gibilin nga maski sakto na unta sa boot aron maoy makabantay sa mga igsoon niini nga anaa pa sa pangidaron nga ato nang nahisgutan? Matud pa sa hepe sa kapulisan sa lungsod sa Alegria nga akong nahinabi sa tulumanon Saksi Evening Edition sa DYSS kaniadtong Sabado nga dili halayo sa panimalay ni Sulpicio Lastimoso anaa didto nagpuyo ang lain niyang anak nga naminyo na. Mao na nga kon motambong man kini sa koronasyon kay ang usa niya ka anak kandidata nganong wala man kini niya ibilin ngadto sa lain pa niyang anak nga naminyo na nga unta dili man lang kini halayo sa ilang panimalay. Ug kon dili man kini niya mahimo nganong wala man siya magbilin og lain pang anak nga sakto na sa boot aron makaluwas unta sa mga bata dihang ang iyang panimalay nasunog? Siyaro naman sab sa katorse niya ka mga anak wala gayoy bot-an na nga bata ang nagpabilin aron makabantay sa gagmay pa niyang mga anak? Ang siete anyos ra gyod kinsa midagan lang pod og iyaha ra?

Daghan nang insidente nga ingon niini ang nahitabo sa nangagi nang katuigan sa probinsiya sa Sugbo, mao nga ako nagtoo nga katapusan na lang kadto pero nausban naman usab kaniadtong Agosto 31? Wa diay makakuha og leksyon niadto ang inahan ug amahan nga si Sulpicio Lastimoso? Kanus-a kaha makakuha og leksyon ang ubang ginikanan sa mga insidente nga susama ani? Ah unya na seguro kon aduna nay inahan ug amahan nga masulod sa prisohan gumikan sa pagpabaya sa pag-atiman ngadto sa ilang mga anak?

Sa gihapon ako manghinaut nga katapusan na unta kadtong nahitabo sa mga anak ni Sulpicio Lastimoso nga nangapaig sa sunog gumikan kay gibiyaan sa ilang mga ginikanan nga mitan-aw ug kalingawan.