Naminaw man god ko sa interview kagahapon sa DYLA ni Dennis Abarientos, usa ka lider sa grupo nga kusog kaayong mosinggit kon dunay mga enkwentro nga mahitabo batok sa mga rebelde ug tropa sa kagamhanan.
Wala ko modayeg sa mga tubag ni Abarientos dihang gisukna siya sa announcer kon wala ba'y tinguha ang iyang grupo nga mohimo'g imbistigasyon sa giingong pagkakaplag sa lubnganan sa mga tawo nga biktima sa mga rebelde didto sa Leyte.
Ang tubag ni Abarientos mao nga kinahanglan kuno nga dunay request kanila ang kadagkoan sa military. Pastilan, kon dunay enkwentro nga mahitabo tali sa mga tropa sa kagamhanan batok sa mga gidudahang rebelde, walay langan-langan naa dayon sila.
Unya, ang tanang resulta sa ilang mga imbistigasyon nagpakita g'yod nga ang mga tropa sa kagamhanan maoy nakahimo og mga sayop, nga milapas sa tawhanong katungod sa mga biktima.
Ambot og duna ba'y bisan usa na lang nga resulta sa ilang imbistigasyon nga nagtumbok sa mga rebelde nga maoy abusado og misangpot sa enkwentro sa mga tropa sa kagamhanan.
Mao na diha nga kining mga grupo nga naglainlain lang og mga ngalan, apan susama rang mga tawo ang nalambigit, madudahan sa kapolisan ug military nga sila mga dumadapig sa mga rebelde.
Kinahanglan g'yod unta nga sila neutral. Kon masayop ang mga rebelde, sawayon. Kon ang mga tropa sa kagamhanan ang masayop, labaw pa nga atong panghimarauton. Mahimo ba ninyo na Mr. Abarientos?
Ang mga giabswelto mao sila si Leny Ouano, usa ni ka lalaki nga taga Tabok, Mandaue, ug si Ma. Lourdes Petallo.
Unsaon, ang mga polis nga nagdakop ni Ouano miingon man nga nakuha g'yod nila ang usa ka paketeng shabu gikan sa iyang posesyon. Apan didto sa korte ilang gibutyag nga diha ra diay sa yuta.
Ang usa ka polis miingon nga nakita niya nga gihulog ni Ouano ang shabu didto sa yuta, apan sa cross-examination miingon nga wala niya makita nga gihulog kay nasalipdan ni sa iyang lawas.
May polis nga miingon nga pagdakop nila ni Ouano nagsinibilyan ra sila, apan ang usa miingon nga nagsul-ob sila og T-shirt nga blue nga may markang POLICE.
Ang mga nagdakop usab ni Petallo, wala usab magkadimao ang pamahayag. Kon maoy magpirmi, dagko kaayo'g bahakhak ang mga dinakpang drug pusher ug users.
Ang kamandoan gihimo mora'g sa miagi pang Disyembre apan hangtud karon wala pa gihapon. Unsa, wala ninyo tumana ang gitahas kaninyo sa inyong labaw'ng opisyal?
Kining giingon nga nailhan na sa mga abogado kinsa ang mga vigilantes, mayo unta og madali nila pagpagawas.
Opening karon sa Broadcasters Month. Magkita-kita ta ha gikan sa Fuente ngadto sa Kapitolyo?