EDITORYAL - Praktis sa polis gisaway

Gikuwestyon sa Cebu Citizen's Press Council ang praktis sa kapolisan sa pagparada o pagdispli sa mga suspek sa krimen atubangan sa media. Apil sab sa gikuwestyon mao ang pagpasul-ob sa suspek og t-shirt nga gipatikan og "Detainee" o "Prisoner."

Matud sa CCPC usa kini ka salawayon nga praktis tungod kay milapas man kini sa katungod sa suspek kinsa wala pa kahukmi nga sad-an sa sumbong nga gisang-at batok kaniya.

Dili lang ang CCPC ang mipadayag sa ilang pagsaway sa gihisgutang praktis. Duna say mga human rights groups didto sa kaulohan nga mikwestyon usab sa maong praktis sa atong law enforcement agencies.

Ang gikabalak-an sa maong mga HR groups mao nga kun pananglitan mahibaw-an nga wala diay makasa ang giparada atubangan sa media dili na matul-id ang kadaut nga nahimo ngadto sa iyang pagkatawo.