Barangay protection order (BPO)

Ang atong mga Barangay Kapitan aduna na karoy gahom nga makadili sa usa ka abusado nga bana, kanhi bana, puyo-puyo, o trato sa usa ka babaye, sa pagpaduol sa naulahi o sa ilang anak aron sa pagdagmal o pagpasakit niini.

Kon kaniadto, ang mga opisyales sa barangay o lungsod, o mga kapulisan dili manghilabot sa mga away entre pamilya sa bana'g asawa, karon, ubos sa Republic Act 9262, gimandoan ang mga opisyales sa barangay ug kapolisan sa paghatag ug tabang ngadto sa mga biktima sa pagpamun-og. Gani, gisilotan na ang pagdumili sa polis o opisyal sa barangay sa paghatag sa iyang tabang ngadto sa biktima.

Kaniadto usab, nabatasan nato, kumo mga Pilipino nga miila sa kasagrado sa kaminyuon, nga modayon kita ug tambag sa manag-tiayon nga magkasungi aron nga sila mahusay ug magkabalik ang maayong kabubut-on, ilabi na kon adunay mga anak. Apan sumala sa RA 9262, ginadili sa mga opisyales ug kapolisan sa paghilot sa panagsungi sa bana'g asawa.

Unsa man kining tabang o gahom sa usa ka Kapitan sa barangay mahitungod sa mga kaso entre sa managtiayon? Kini mao ang Barangay Protection Order kon BPO, nga magdili sa usa ka madaug-daugon nga bana o amahan sa pagpaduol sa iyang asawa o puyo-puyo o trato o sa ilang anak, aron kini kulatahon o pasakitan. Ang paglapas sa maong kamandoan sa BPO giila nga usa ka kalapasan nga mahimong silotan sa korte og pagka-bilanggo.

Ang usa ka kulatado nga asawa o puyo puyo o trato mahimo nga moduol sa Barangay Hall, aron sa pagsumbong sa pagdaug-daug kaniya, pinaagi sa pagsulat sa mga detalye sa usa ka porma nga ihatag sa barangay. Ang Barangay gikinahanglan ng mopagawas sa Barangay Protection Order (BPO) sulod sa 24 oras gikan sa pagsumite sa sinulatan nga porma.

Kon ang asawa dili makahimo sa pagsumbong ngadto sa Barangay, mahimo usab nga i-isyu ang BPO gumikan sa sumbong sa ginikanan o kaparyentehan sa hingtungdan, sa pulis o taga DSWD o social worker sa lungsod, abogado sa hingtungdan, o duha ka mga lungsuranon nga adunay kasayuran sa maong pagpanagmal.

Ang BPO ma-isyu bisan dili mapatawag ang sinumbong nga bana, ug epektibo sulod sa kinse ka adlaw. Pagkahuman o sa dili pa mahuman ang kinse ka adlaw, ang biktima mas maayo nga moadto sa korte aron mangayo og permanente nga Protection Order aron pag proteher kaniya o sa ilang mga anak.

Alang sa inyong mga panahom o reaksyon, palihug e-mail sa [email protected] o text sa 0915-5536986. Daghang salamat.