Electronic draw na sab

Nagpadayon gihapon ang text scam. Ambot kon kanus-a pa kini masumpo sa hingpit. Daghan ang nabiktima niini. Ang uban nga nagduhaduha wala mosanong; wala sila mailad. Pero daghan gyod ang nalit-ag tungod sa abundang pasalig ug makahilo sa hunahuna nga mga patuo sa mga responsable sa text scam.

Usa ka magbabasa niining lindog nag-text nga nagkanayon: "Good day. Gusto ko lang sanang itanong kung totoo ba itong tineks sa akin na nanalo raw ako nga P300,000 sa Philippine Charity Foundation via electronic draw. Wala naman ticket nito kahit isa." -- 0920-4148235 (August 8, 2006 -- 19:23:54)

Ang akong ikasulti mao nga ayaw kamog tuo niini. Wala kiniy basehanan. Wala gani masayod ang Philippine Charity Foundation mahitungod niini. Mugna lang kini sa imahinasyon sa mga tawo nga gustong mangilad sa ilang isigkatawo busa dili gayod kini angay ninyong tuohan.

Sa higayon nga makadawat kamog congratulatory text message nga nagpatuo nga nakadaog kamog dakong kantidad, i-ignore ninyo ang maong text. Ayaw gayod ninyo hatagig pagtagad kay 101% niini ang bakak. Timan-i gyod nga dili katuohan nga makadaog ka sa usa ka promo nga wala nimo salmoti. Kon tinuod pa kana, daghan na unta kanato ang naluwas gikan sa kawad-on. Walay daghang kuwarta nga ipanghatag karong panahona; naa hinuon ing daghang kawatonon!

* * *

Sa laing bahin: "Kining Smart, no, bisan og wala ko ni-text mo-check operator lang og kalit ang imong cellphone. Bisan pag unlimited unya daghan pag extra nga load, mo-check operator gihapon. I don't know why. Mao nga di na ko ganahan sa SIM nako nga Smart." -- 0921-6980224 (August 14, 2006 -- 2:21:15)

Daghan na ang mireklamo mahitungod niining maong kakulian pero hangtod karon wala kini hatagig pagtagad sa mga network provider. Nagsalig tingali sila kay sila man ang makapabor kanunay mao nga wala na lang nila baleha ang mga bagulbol sa ilang mga subscriber.

(Sumbong ug reklamo? Text sa 0910-8105522)