Dalidali nga nabali

Ang pinaspasay nga pagpapanumpa sa Professional Regulation Commission (PRC) sa mga tinun-an nga nakapasar sa kontrobersiyal nga nursing board exam niadtong Hunyo ning tuiga wa katabang sa mga paningkamot pagpahibalik sa kaligdong sa pasulit ug sa tanang niapil ini. Ang kalit nga pagtakda sa PRC sa oath-taking, nga morang mga pinangita sa balaod ang wa kaandam nga mga gradwado nga nagkamisin lang nga nanumpa, nakapalig-on lang sa mga pasangil sa palusot.

Pun-an pa sa temporary restraining order (TRO) nga giluwatan sa Court of Appeals (CA) di lang batok sa pagpapanumpa kon dili apil na sa pagkuwenta sa grado sa tanang nikuha sa pasulit, ang tibuok hulagway nisamot kalang-og. Samtang maka-ikyas na sa TRO ang kaliboan ka mga tinun-an sa Sugbo nga nakapanumpa na sa niaging duha ka adlaw, ang nagkalapad nga landong sa pagduda padayong mohamok sa ilang panarbaho, labi nang kinabag-an nila nga nagpanikad nang molayas sa atong kabaybayonan.

* * *

Unsa man intawon ang nasud sa bakukang sa kadagkoan sa PRC? Nganong hasta ang ilang gitakda nga petsa sa pagpapanumpa, ang Agosto 22, wa man nila tuohi? Naapiki nang daan sa kapakyas pagbantay sa kaligdong sa pasulit, karon ang PRC magkapuliki na sab og panagang sa pagduda nga nakatimaho nang daan sa TRO maong nagdalidali pagpapanumpa sa mga tinun-an aron pagsabotahe sa lehitimong kamandoan sa hukmanan.

Samtang ang TRO igo lang nipugong ug wa pa modason sa mga pasangil nga labihan kalapad sa binuang nga nakapabuong sa kinatibuk-ang pasulit ug nakapahimutang sa pagduda sa mga grado sa tanang nikuha ini-ang mga nakapasar ug ang mga nahagbong, wa unta magkarakara ang PRC. Wa gyod untay mawa kon gihuwat pa lang nga mahuman ang tanang pakisusi ug patubag ang tanang pangutana labot sa leakage sa pasulit.

* * *

Salamat sa morang gisilihan nga kadagkoan sa PRC, nadugangan ang suliran sa mga tinun-an ug mga ginikanan. Nahasol na silang daan sa pasulit nga kuwestiyonable, karon nadugangan pa-nahinayak na sab hinuon sa pagpapanumpa nga mahimong pag-usik-usik lang sa kahago ug panahon, ug kuwarta kay nahinayon mang kumbira sa pipila, kon hingpit sang mabasura uban sa pasulit.

Apil sa gipugngan sa CA mao ang Board Resolution 31 nga maoy gipasikaran sa inusab nga paagi pagkuwenta sa grado sa mga tinun-an nga wa na apila ang mga pangutana nga nalista sa gipakatap nga leakage, nga karon nitumaw nga di lang sa Baguio kon dili apil na sa Metro Manila ug pipila ka tulonghaan sa Kabisay-an. Gihatagan sa CA og gibug-aton ang argumento sa UST ug ubang petitioners nga ang kinabuhi sa mga pasyente maoy mameligro kon hatagan og lisensiya ang nurses nga mahimong way igong kinaadman kay nakapasar lang tungod sa tikas.

* * *

Email: leo_lastimosa@abs-cbn.com